Dýnaı ózeninde iri apat boldy
NUR-SULTAN. QazAqparat - Býdapeshtte qutqarýshylar mamyr aıynyń sońynda úlken laınermen soqtyǵysyp, sýǵa batyp ketken kemeni sý túbinen alyp shyqty. Dýnaı ózeninde sońǵy 65 jyl kóleminde bolmaǵan iri apat saldarynan 28 adam qaza tapty. Bul týraly QazAqparat bbc.com saıtyna silteme jasap habarlaıdy.
Súńgýirler keme qaldyqtarynyń ishinen qaza bolǵan tórt adamnyń denesin alyp shyqty. Taǵy tórt adamnyń máıiti tabylmaı otyr.
29 mamyr kúni keshke Býdapesht ortalyǵyndaǵy qalanyń batys bóligi (Býda) men shyǵys bóligin (Pesht) qosatyn Margarıta kópiriniń astynda eki keme soqtyǵysyp qaldy.
Keıinnen anyqtalǵandaı, iri shveıtsarlyq Viking Sigyn saıahat kemesi Hableany kemesine soǵylǵan.
Keme bortynda Ońtústik Koreıadan kelgen týrıstik toptyń 35 adamy men eki ekıpaj múshesi - kapıtan jáne onyń kómekshisi bolǵan. Jeti adam qutqaryldy.
