«Dýman» OSO-da sóıleıtin anımatronıksterdiń tusaýy kesildi
ASTANA. QazAqparat - Búgin Astanadaǵy Dýman oıyn-saýyq ortalyǵynda «Korall ata men Mýrenka» atty robottandyrylǵan kompozıtsııanyń tusaýy kesildi. Ol qozǵalatyn ári sóıleıtin eki robottan quralyp, oıyn-saýyq ortalyǵyna kelýshilerge gıd retinde qyzmet kórsetedi.
Robottardyń biri - kári ári danyshpan Korall shal beınesinde, al ekinshisi kishkentaı balyq Mýrenka. Olar ózara sóılesip, ortalyqqa kelýshilerdi Okeanarıým men Djýnglıge qonaqqa shaqyrady.
Kompozıtsııanyń jalpy aýdany 15 sharshy metr, bıiktigi 5 metr. Anımatronıkster barlyq qozǵalystardy kompıýterlik baǵdarlamalaý arqyly jasaıdy. Olar sóılegen kezde bet-álpeti de kádimgi adamnyń júzi sııaqty myń qubylyp, kúlgende beti búlkildep, kózi ashylyp-jumylyp, erinderi aıtqan sózderine baılanysty qozǵalady.
Aıta keteıik, bul anımatronıksterdi túgeldeı qazaqstandyq «EHRO-life» kompanııasy jasap shyǵardy.
«Bizdiń anımatronıksterimizge úlken tehnıkalyq áleýet salynǵan, biz ony odan ári damyta túspekpiz. Jaqyn bolashaqta anımatronıks ınteraktıvti qabilettermen qamtamasyz etiledi. Sóıtip olar án aıtyp, óleń oqyp, kelýshilerdiń suraqtaryna jaýap berip, tipti olarmen áńgimelese de alatyn bolady», - dep atap ótti kompanııa dırektory Marat Saırambaev.
Onyń aıtýynsha, kompanııa taǵy birneshe jańa anımatronıkster jasaýda. Olar da jýyq arada «Dýman» oıyn-saýyq ortalyǵyna qoıylady.
