Dýlyǵa Aqmolda halyqaralyq kınofestıvalde úzdik akter atandy
ALMATY. QazAqparat - Akter Dýlyǵa Aqmolda Qazan qalasynda ótken Halyqaralyq kınofestıvalde úzdik akter atandy, dep habarlaıdy QazAqparat tilshisi «Qazaqfılm» AQ baspasóz qyzmetine silteme jasaı otyryp.
Rejısser Sábıt Qurmanbekovtiń «Oralman» fılminde basty róldi somdaǵan akter Dýlyǵa Aqmolda 5 jáne 11 qyrkúıek aralyǵynda Tatarstanda ótken XIII Halyqaralyq musylmandar kınosy festıvalinde «Úzdik er adam róli» júldesimen marapattaldy.
«Oralman» fılmi týǵan jerinen ketýge májbúr bolǵan, alaıda ondaǵan jyldar ótken soń Aýǵanstannan eline qaıta oralǵan qandastarymyz jaıly.
- Tolyqmetrajdy kartınalarda somdaǵan rólderim ishindegi bul meniń alǵashqy jeńisim, óte qýanyshtymyn. Bul tek meniń ǵana tabysym emes, rejısser Sábıt Qurmanbekovtyń, operator Mars Omarovtyń, qoıýshy sýretshi, kompozıtordyń, sonymen qatar barlyq túsirý tobynyń eńbegi. Olardyń barlyǵyna alǵysymdy bildire otyryp, osy jeńispen quttyqtaımyn, - dedi akter Dýlyǵa Aqmolda.
Qazaqstan Respýblıkasy Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdııasy túsirgen atalmysh fılm osy festıvaldiń negizgi baıqaýynda 10 tolyqmetrajdy kartınamen baq synasty. Jalpy festıvalge qatysýǵa 61 elden 782 fılm usynys tastaǵan.
Aıta ketsek, festıvaldiń «Úzdik fılm» júldesin túrik rejısseri Mustafa Qaranyń «Kalandra yzǵary» fılmi, al «Úzdik rejısser» júldesin úndi rejısseri Mangesh Djoshı («Djoshı jonýshy» fılmi úshin) ıelendi. Reseıdiń eki kartınasy da júldeli oryndardan kórindi «Amýn» fılmi «Úzdik stsenarıı» júldesimen marapattalsa, «Sofıchka» fılminiń operatory Aırat ıAmılov úzdik operator atandy. Al «Úzdik áıel adam róli» júldesi «Áıel kúni» fılminiń úsh aktrısasyna buıyrdy.
Atalmysh halyqaralyq musylmandar kınosy festıvali - 2005 jyldan beri Tatarstanda ótkizilip kele jatqan Reseıdiń iri kınofestıvalderdiń biri.
Esterińizge sala ketsek, «Oralman» kórkem fılmi osy jyldyń basynda Irannyń astanasy Tegeranda ótken 35-shi Halyqaralyq Fadjr kınofestıvalinde Bas júldeni, sonymen qatar XIII Halyqaralyq «Eýrazııa» kınofestıvalinde Bas júldesin jeńip alǵan bolatyn.
«Oralman» kórkem fılmi 15 qyrkúıekten bastap elimizde prokatqa shyǵady. 
