Dulqaıyrov energetıka salasyndaǵy lobbı týraly aıtyp berdi
ASTANA. QazAqparat - Búgin Astanada bastalǵan Energetıkalyq forýmnyń májilisi kezinde Qazaqstannyń ınjener-energetıkteri odaǵynyń bas dırektory Marat Dulqaıyrov «elimizde energııanyń profıtsıti bar» degen pikirmen kelispeı, qýat kózderin teń dárejede taratý máselesin kóterdi. Onyń aıtýynsha, elektrenergııany artyǵymen óndirip otyrǵan kásiporyndar úshin qýat kózderi tapshy aımaqtarda jylý elektr stansalarynyń salynǵany tıimsiz. Sol sebepti keıbir qoǵam belsendileri iri korporatsııalardyń múddesin qorǵap júr, dep xabarlaıdy QazAqparat tilshisi.
«Bizde eshqandaı profıtsıt joq, kerisinshe, defıtsıt baıqalady. Elektrenergııanyń profıtsıti tek Pavlodar oblysynda ǵana bar. Sebebi ol jerde Ekibastuz ben Ermakov sııaqty eń iri degen jylý elektr stansalary ornalasqan. Al Qazaqstannyń basqa aımaqtarynda energııanyń tapshylyǵy barynsha sezilip otyr. Ásirese, ońtústik óńirlerde bul problema ózekti bolyp tur. Qazir biz soltústiktegi energııany ońtústikke qajetti kólemde jetkize almaı otyrmyz. Sebebi eki jeliniń júktemesi 500 KVolttan aspaıdy. Oǵan qosa, atalǵan jeliler boıynsha árbir oblystyń ózindik kvotasy, ıaǵnı energııany tutynýdyń shekti kólemi engizilgen. Al Mańǵystaý, Atyraý men Batys Qazaqstan oblystary Qazaqstannyń energetıkalyq júıesine múldem qosylmaǵan. 25 jyl ótti. Atalǵan aımaqtardyń qýat kózderin áli kúnge deıin Reseı Federatsııasy retteıdi. Osylaısha, ońtústikte tapshylyq, batys ortaq júıege qosylmaǵan. Ondaıda qaıdaǵy profıtsıt bolady?», - deıdi ol.
Mamannyń aıtýynsha, bıyl sýdyń kólemi kóp bolǵannan keıin gıdroelektro stansalardyń arqasynda qajetti energııa kózderi óndirildi. Al bir-eki jyldyń ishinde sýdyń kólemi azaısa, energetıka salasyndaǵy jaǵdaı shıelenise túsedi.
«Búginde profıtsıt týraly jıi-jıi aıtyp, ońtústikte elektrstansany salý máselesinen aınalyp ótkisi keledi. Ol stansany salý qajet. Ony on jyl buryn salý kerek edi. Rodostovets myrza (Qazaqstannyń taý-ken jáne metallýrgııa salasyndaǵy kásiporyndary qaýymdastyǵynyń atqarýshy dırektory Nıkolaı Rodostovets - avt.) profıtsıt bar dep aıtady. Endi, ol ózi korporatsııanyń ókili... Olarda Aqsý elektr stansasy bar. Árıne, oǵan atalǵan stansada óndiriletin barlyq elektr energııanyń satylǵany tıimdi. Sondyqtan «ońtústikte jylý elektr stansasyn salmańdar» dep otyr. Ne aıtamyz, bul korporatsııanyń múddesi. Ol jaǵynan Rodostovets jarady. Biraq nege biz oǵan senýimiz kerek?», - deıdi M.Dulqaıyrov.
