Dýlat Isabekovtiń "Bórtesi" jaqyn arada AQSh teatrlarynda qoıylady
Saltanatty sharada óńir jurtshylyǵy men oqyrman qaýym qalamgerge qurmet kórsetip, shyǵarmashylyǵyn joǵary baǵalady. Mereıtoı barysynda D.Isabekovtiń ómiri men shyǵarmashylyǵyna arnalǵan kitap kórmesi uıymdastyryldy.
Jıyn Túrkistan mýzykalyq drama teatrynda jazýshynyń «Bórte» spektaklimen jalǵasyn tapty.
Oblys ákimi Darhan Satybaldy Dýlat Isabekovti quttyqtaý sózinde, onyń ádebıette ǵana emes, pýblıtsıstıka, drammatýrgııa salalarynda da óz jolyn qalyptastyrǵanyn jetkizdi.
«Týǵan jerińiz – qasıetti Túrkistan óńirine kelip, mereıtoıyńyzdy jalǵastyrý – biz úshin úlken mártebe. Jýyrda Memleket basshysy Qasym-Jomart Toqaev Túrkistanǵa rýhanı jáne tarıhı astana mártebesin berýdi usyndy. Osy baǵytta jumys júrip jatyr. Túrkistan – Qazaq handyǵynyń astanasy bolǵan uly shahar. Tarıhı sheshimder osy qalada qabyldanǵan. Bizdiń Túrkistandy damytýdaǵy basty maqsatymyz – óńirdi Túrki áleminiń rýhanı-mádenı ortalyǵyna aınaldyrý. Bul maqsatty júzege asyrýda ózińizdeı qalamgerlerdiń, osyndaı is-sharalardyń qosar úlesi mol», – dedi oblys ákimi
Dýlat Isabekov kórermender men aımaq turǵyndaryna rızashylyǵyn bildirip, alǵysyn aıtty.
«Shetelderdegi ádebı jıyndarda, qoıylymdarymnyń premeralarynda qazaq ádebıeti, tarıhy, mádenıeti týraly oı qozǵap júremin. Búginde «Bórte» spektakli halyqaralyq deńgeıde tanylyp otyr», – dedi jazýshy.
Tarıhı týyndyny tamashalaýǵa tek Túrkistan oblysy ǵana emes, ózge óńirlerden de kórermender arnaıy kelgen eken. Aldaǵy ýaqytta «Bórte» AQSh memleketiniń teatrlarynda da usynylady dep josparlanyp otyr.
