Dýlat Isabekov: Toıǵa topyrlap bara beretin bolsaq - indetten qutylmaımyz
NUR-SULTAN. QazAqparat – Jazýshy Dýlat Isabekov koronavırýs indetin jeńý úshin sabyr saqtap, toıǵa barýdan bas tartý kerek ekenin aıtty, dep habarlaıdy QazAqparat tilshisi.
«Meniń de baratyn jerim kóp, biraq bara almaımyn. Týǵan qudam qaıtys bolǵanda da bara almadym. Topyraq sala almaı qaldyq Adam aıaǵy sıregen soń, 2-3 adam ǵana bolatynyn bilgennen keıin qyrqyna baryp keldim. Basqa kesel - kesel, bul keseldiń beti jaman», - deıdi Dýlat Isabekov.
Ol halyqty indet kezinde sabyr saqtaýǵa shaqyrdy.
«Eger osylaı aıtqan sózdi tyńdamaı, elemeı, toıǵa topyrlap bara beretin bolsaq - bul indetten, bul keselden eshqashan qutyla almaımyz. Osy esimizde bolsyn», - deıdi ol.
