Dýlat Isabekov: «Qazaq eli» anımatsııalyq fılmin kópshiliktiń nazaryna uıalmaı usyna alamyz
ASTANA. QazAqparat - «Qazaq eli» anımatsııalyq fılmin kópshiliktiń nazaryna uıalmaı usyna alamyz. Búgin Ortalyq kommýnıkatsııalar qyzmetindegi baspasóz máslıhatynda jazýshy, dramatýrg Dýlat Isabekov osylaı málim etti.
«Qazaq eli» anımatsııalyq fılmin kópshiliktiń nazaryna uıalmaı usyna alamyz. Eger uıalatyn jerleri bolsa, tanystyrylymǵa kele qoımas edim. Bul jigitterdiń anımatsııalyq fılmdi túsirýdegi sheberlikterine rıza bolyp otyrmyn. Osy fılmge shetelden qyzyǵýshylyq baıqalýda», - dep toqtaldy dramatýrg.
Osy oraıda fılmniń utatyn tustary kóp ekenine toqtalǵan D. Isabekov, ondaǵy Kereı men Jánibektiń ósý evolıýtsııasy erekshe unaǵanyn atap ótti.
«Fılm barysynda olardyń Otyrar kitaphanasynan bilim alýy, ǵulama ustazdardyń dárisin tyńdaýy, bolashaq basqarýshylardyń qalaı bolýy kerektigi kórsetilgen. ıAǵnı, balalarǵa sabaq alatyn jerleri kóp. Sondyqtan búgingi kúnmen úndesip jatatyn fılm shyǵardyq. Qazaq anımatsııalyq fılmindegi úlken tabys retinde tanystyryp otyrmyz»,-dedi fılmniń ádebı keńesshisi.
Aıta keteıik, fılmniń tarıhı keńesshisi - tarıh ǵalymdarynyń doktory, professor Jambyl Artyqbaı. Fılmniń ádebı keńesshi - Dýlat Isabekov, rejısseri - Batyrhan Dáýrenbekov, stsenarısi - Saǵadildá Úsibálıev, Baqytjan Quljabaı, kompozıtory - Rýslan Shynyqulov, qoıýshy sýretshisi - Azamat Ernazarov, fılmniń dırektory - Nýrıddın Patteev, bas prodıýsseri - Sábıt Ábdiqalyqov.
