Dýlat Bekbaýov bokstan álem chempıonatynyń kúmis júldegeri boldy

ASTANA. QazAqparat – Tashkent qalasynda bokstan erler arasynda ótip jatqan álem chempıonatynda Dýlat Bekbaýov kúmis júldeger atandy, dep habarlaıdy QazAqparat tilshisi.

Dýlat Bekbaýov 67 kelige deıingi salmaqta ózbekstandyq Asadhýdja Mýıdınhýdjıevpen qolǵap túıistirdi.

Osyǵan deıin qarsylastar ózara bir ret kezdesip, onda Dýlat jeńgen edi.

Bul joly alǵashqy raýndta ózbekstandyq boksshynyń soqqylary dálirek tıdi – 5:0. Ekinshi kezeńde bes tóreshiniń tórteýi A.Mýıdınhýdjıevke basymdyq berdi. Úshinshi raýndta Dýlat Bekbaýov alǵa umtylyp baqqanymen, kesh boldy. Qorytyndy esep – 5:0, ózbekstandyq sportshynyń paıdasyna sheshildi.

Qalǵan úsh boksshymyz altyn júlde úshin erteń talasady. Mahmud Sabyrhan (54 kg) men ulttyq qurama kapıtany Aslanbek Shymbergenov (71 kg) ózbekstandyqtar Oıbek Djýraev, Saıdjamshıd Djafarovpen, al Nurbek Oralbaı (80 kg) qytaılyq qandasymyz Toqtarbek Tańathanmen rıngke shyǵady.

Eske sala keteıik, budan buryn búgin Tashkentte Sanjar Táshkenbaı men Dýlat Bekbaýovtyń altynǵa talasatynyn jazǵan edik.

Sanjar Táshkenbaı Tashkentte bokstan álem chempıony atandy.