Dúkennen oıynshyqtardy sypyryp ketken qostanaılyq qamaýǵa alyndy
QOSTANAI. QazAqparat - Qala ortalyǵyndaǵy dúkenderdiń birinen oıynshyq urlap ketken qostanaılyq qamaýǵa alyndy, dep habarlaıdy QazAqparat oblystyq ІІD baspasóz qyzmetine silteme jasap.
Qostanaı qalasynyń ІІB kezekshi bólimi Chehov kóshesindegi dúkenderdiń birinen oıynshyqtardyń qoldy bolǵany týraly habar alady.
«Dúken sórelerinen "Loto", "Domıno" sııaqty birneshe damytatyn oıynshyq pen qurastyrǵyshtar urlanǵan. Jedel-izdestirý sharalary barysynda polıtseıler 31 jastaǵy er adamdy ustady. Keıinnen onyń oblystyq narkologııalyq dıspanserde emdelip júrgeni anyqtaldy. Shyǵyn kólemi 18 500 teńgeni qurady», - dep málimdedi ІІD baspasóz qyzmeti.
Urlanǵan zattardyń barlyǵy tárkilendi. QR QK 188-baby («Urlyq») boıynsha sotqa deıingi tergeý júrgizilýde.
