Dúkennen ańdyǵan: Elordalyq kelinshekti úıge kireberiste tonap ketti
Nur-Sultan qalasy Polıtsııa departamentiniń málimeti boıynsha, kúdikti Taraz qalasynyń turǵyny bolyp shyqty.
«Jábirlenýshiniń aıtýynsha, qaskúnem oǵan Syǵanaq kóshesindegi úıdiń kireberisinde shabýyl jasap, moınyndaǵy altyn alqany jula qashqan. Áıel qaraqshyny kórip, onyń syrtqy sıpatyn este saqtap úlgergen. Polıtsııa kúdiktiniń kim ekenin kóp uzamaı anyqtady. Jedel-izdestirý sharalary kezinde saqshylar kúdiktini ustady. Ol elordada ýaqytsha turyp jatqan 28 jastaǵy Taraz qalasynyń turǵyny bolyp shyqty», - dep jazady departamenttiń baspasóz qyzmeti.
Áýeli polıtsııa qyzmetkerleri kúdiktiniń oqıǵa ornynda Nissan Cefiro kóligin toqtatyp, sonymen qashyp ketkenin anyqtaıdy. Kúdikti mingen kólik Qorǵaljyn tasjoly men Aıtmatov kóshesiniń qıylysynda ustalǵan. Tonaýshy qylmystyń izin jasyrý úshin qolyndaǵy áshekeı buıymdy oryndyqtyń astyna tyqqan.
«Ol keıin jábirlenýshini dúkende turǵanda baıqaǵanyn, alqasyn tonaý týraly oı sol kezde paıda bolǵanyn moıyndady. Áıeldiń izinen ańdyp, urymtal tusqa kelgende alqany julyp qashqan. Qazir ol ýaqytsha ustaý ızolıatorynda. Ústinen «Tonaý» baby boıynsha qylmystyq is qozǵaldy», - delingen resmı málimette.