Dúkenge qarýly shabýyl jasaǵan eki kúdikti ustaldy - Petropavl
ASTANA. QazAqparat - Petropavldyq quqyq qorǵaýshylary táýlik boıy jumys isteıtin dúkenge qarýly shabýyl jasady degen kúdikpen eki er adamdy ustady, dep habarlaıdy «QazAqparat» HAA tilshisi SQO ІІD baspasóz qyzmetine silteme jasap.
Vedomstvonyń habarlaýynsha, oblys ortalyǵynyń Panfılov kóshesindegi dúken tańǵy saǵat 05:00 shamasynda tonalǵan.
«Dúkende ornatylǵan beınebaqylaý kameralary arqyly eki er adamnyń betperde kıip alyp, kúzetshini qorqytyp, sanaýly sekýndtardyń ishinde kassadaǵy aqshany alyp ketkeni anyqtalǵan. Sonymen birge, olar kúzetshiniń travmatıkalyq pıstoletin tartyp alǵan. Oılastyrylǵan qylmys bolǵandyqtan, kúzetshi de, satýshy da ne bolǵanyn ańǵarmaı qalsa kerek. Qylmystyń aldyn ala oılastyrylǵany belgili boldy», - dep habarlaıdy ІІD-niń baspasóz qyzmeti.
Arada kóp ótpeı tártip saqshylary 1993 jáne 1998 jylǵy eki er adamnyń izine túsip, olardy qolǵa túsirgen. Qolǵa túsken kezde olarda qolǵap, betperde men kúzetshiniń pıstoleti tabylǵan. Dúken qalanyń shetinde ornalasqandyqtan, urylar osy dúkendi tonaýdy sheshken kórinedi. Qaziri ýaqytta istiń tolyq mán-jaıy anyqtalý ústinde.
