Dúkenge baratyn ruqsatnama, blokposttyń bolmaýy jáne ushý apparattary - Qazaqstandyq áıel Dýbaıdaǵy karantın týraly aıtyp berdi

- Aınur hanym, ózińiz týraly aıtyp berińizshi, birneshe jyldan keıin elge oralýyńyzǵa ne sebep boldy?

- Dýbaıdaǵy karantın kúsheıe túskendikten, Qazaqstanǵa qaıta ushý qajeı dep sheshtim. Onyń ústine, elimizdiń Syrtqy ister mınıstrligi Qazaqstanǵa sońǵy reıs ushatynyn málimdegen edi. Qazir Ámirlikterde tártip kúsheıdi, dúkenge de arnaıy ruqsatpen barý qajet. Onyń ústine Dýbaıda ómir súrý deńgeıi qymbat, al kóptegen adamdar jumyssyz qalyp, eńbekaqysynan aıyrylyp, tyǵyryqqa tirelip jatyr. Men onda 7 jyl boıy jyljymaıtyn múlik boıynsha agent bolyp jumys istedim. Bul kásippen aınalysatyn adamdar óte kóp. Al qazir pandemııaǵa baılanysty tabys túsip jatqan joq. Tipti anamnyń josparlanǵan saparyn keıinge qaldyrdyq.

- Qazaqstanǵa ushyp kelgende esh qıyndyq týyndamady ma?

- Barlyǵymyz medıtsınalyq maskamen, tyńǵylyqty daıyndyqpen ushtyq. Tipti kózildirik pen bas kıim kıgen jolaýshylar kóp boldy. Elge kelgende júgimiz de, ózimiz de dezınfektsııalyq tazartýdan óttik. Barlyǵy joǵary deńgeıde boldy jáne bizdi birneshe avtobýsqa bólip, sanatorııler men aýrýhanalarǵa jetkizdi.

- Sizdi qandaı ǵımaratqa ornalastyrdy? Bir bólmede neshe adam bar?

- Bizdi Taldyqorǵan qalasyndaǵy qonaqúıge jaıǵastyrdy, bir bólmede 3 adamnan jatyrmyz. Bizge karantındegi júrip-turý tártibin túsindirdi. Tamaq ákelgende de bizge asa jaqyndamaýǵa tyrysady. Mundaǵy taǵamdar da jaqsy, kúnine bes ret tamaqtandyrady. Onyń ishinde et, manty sekildi túr-túri bar. Osyndaı jaǵdaı jasaǵany úshin bılik pen konsýldarǵa alǵys aıtamyn.

- Týǵan-týystaryńyzben qalaı sóılesip turasyz?

- Munda ınternet bar. Biraq, beınebaılanys bireýde júktelse, bireýde júktelmeıdi. Men óz jaqyndarymmen WhatsApp messendjeri arqyly sóılesemin.

- Karantınde jatqanyńyzǵa neshe kún boldy? Qaı kúni shyǵaraıyn dep jatyr?

- Meniń kelgenime úsh kún boldy. Barlyq qajetti testileýden óttik, bizden esh vırýs tabylmady. Sondyqtan, búgin nemese erteń bizdi úıimizge jetkizedi. Biz oqshaýlaný kezinde otyratyn mekenjaıymyzdy birneshe ret kórsettik. Áleýmettik jelide Taldyqorǵan turǵyndary bizdi ınfektsııa juqtyrady dep alańdap jatyr eken. Bul múmkin emes, sebebi mundaǵy tártip óte qatal. Kóshe túgili bólmemizden dálizge shyǵýǵa tyıym salynǵan. Sondyqtan, birde-bir baılanys bolmaıdy. Úıde oqshaýlanatyn múmkindigi joqtar, ıaǵnı jeke bólmesi joq, 65 jastan asqan týysy bar turǵyndarǵa da memlekettik mekemelerde oqshaýlanýǵa jaǵdaı jasalǵan.

- Siz Qazaqstan men Birikken Arab Ámirlikterindegi karantındi kórdińiz. Eki eldi salystyrar bolsańyz, qaı eldiń talaptary kúshtirek bolyp otyr?

- Men Qazaqstandaǵy karantındi áli kórgen joqpyn. Arnaıy reısti, áýejaıdy jáne qonaqúıdegi karantındi aıtar bolsam, bári júıelengen. Dýbaıda tipti dúkenge ruqsatsyz shyǵarmaıdy. Ol úshin arnaıy forma toltyrý qajet. Bul qaǵazben dúkenge, jumysqa jáne dárihanaǵa ǵana barýǵa bolady. Jumysqa da medıtsınalyq mamandar, polıtseıler, azyq-túlik jetkizýshiler sekildi asa qajet mamandar ǵana barady. Dýbaıda da qatań sharalar qolǵa alynyp jatyr. Onda blokposttar qoıylmaǵan, tek polıtsııa tártip kúzetip turady. Ár aýlada beınebaqylaý kamerasy bar polıtsııa kóligi bar, keı jerlerde dron ushyp júr.

- Mundaı sharanyń barlyǵy shynymen qajet pe?

- Árıne, barlyq aldyn alý sharalaryn ustaný qajet. Ámirlikterdegi kóptegen dostarym koronavırýs ınfektsııasymen aýyrdy. Bul jaı ǵana tumaý nemese JRVI emes, ony emdeý jolyn da eshkim bilmeıdi. Máselen, Ábý-Dabıdegi tanysym koronavırýs juqtyrdy. Sebebi, onda Dýbaıdaǵydaı qatań talaptar qoıylmaǵan.

- Arnaıy bort jolaýshylary arasynda koronavırýs juqtyrǵandar boldy ma?

- Joq, bizdiń jolaýshylar arasynan koronavırýs tabylmady. Sondyqtan, bizdi úı karantınine jibergeli jatyr. Medıtsınalyq mamandar bizge telefon arqyly nemese úıge kelip, karantın talaptaryn saqtaǵanymyzdy tekseredi. 24 kún boıy úıde bolýymyz kerek.

- Karantın men oqshaýlanýdy ár adam ártúrli qabyldaıdy. Ásirese, psıhologııalyq turǵyda qıyn tıetini baıqaldy. Oqshaýlanýdy óz basynan ótkergen adam retinde qandaı keńes berer edińiz?

- Eń aldymen, boıymyzǵa qıyn júktemeler artpaý qajet. Kóptegen adamdar karantınde buryn-sońdy jasap kórmegen isterdi qolǵa alýda. Oǵan qaraǵanda, qalypty úırenshikti rıtmdi saqtap qalǵan durysyraq. Densaýlyq úshin jattyǵýlar jasap, dárýmen iship, týystarǵa habarlasý kerek. Sonymen birge, qazirgi ýaqytta adamnyń ózin negatıvti jańalyqtardan da oqshaýlaǵany mańyzdy bolyp otyr.

- Ýaqyt bólip, suhbattasqanyńyz úshin rahmet!