Dúkenderdegi májbúrli satyp alýdan qalaı qorǵanýǵa bolady
ASTANA. KAZINFORM - Qazaqstan turǵyndary jıi qosymsha qyzmetter men taýarlardy májbúrli túrde satyp alýǵa tap bolýda. Smartfon satyp alý mindetti saqtandyrýmen nemese aqyly baptaýlarmen baılanystyryp beriledi, al turmystyq tehnıka tek aksessýarlarymen birge usynylady. Mundaı jaǵdaılar tutynýshylardy ashýlandyryp qana qoımaı, zań talaptaryn da buzady. Bul týraly Tutynýshylardyń quqyqtaryn qorǵaý komıtetiniń aqparatynda aıtylǵan.
Zań ne deıdi?
Qazaqstan Respýblıkasynyń «Tutynýshylardyń quqyqtaryn qorǵaý týraly» Zańynyń 28-babyna sáıkes, satýshy taýardy nemese qyzmetti qosymsha ónimmen mindetti túrde satyp alýdy talap etýge quqyǵy joq. Árbir tutynýshy erkin tańdaý quqyǵyna ıe. Eger sizge taýardy tek qosymsha satyp alýmen ǵana usynsa, bul — sizdiń quqyqtaryńyzdyń tikeleı buzylýy.
Sarapshylar mundaı áreketterdiń basty sebebin dúkenderdiń tabysty arttyrýǵa degen umtylysynan kóredi. Qosymsha satylymdar, ıaǵnı aksessýarlar nemese qyzmetter, bıznestiń paıdasyn kóbeıtedi. Alaıda bul strategııa uzaq merzimdi perspektıvada tıimsiz: kóńili qalǵan tutynýshylar brendke degen senimin joǵaltady, al bul óz kezeginde shyǵyndarǵa ákelýi múmkin.
Tutynýshylar úshin bul tek yńǵaısyzdyq qana emes, artyq shyǵynǵa da ákeledi. Saqtandyrý rásimdeý, aksessýarlar satyp alý nemese aqyly baptaýlar taýardyń jalpy qunyn arttyrady. Keıbir tutynýshylar naryqtaǵy usynystardyń azdyǵyna baılanysty qajetti taýardan aıyrylyp qalmas úshin osyndaı sharttarǵa kónýge májbúr bolady.
Quqyqtaryńyzdy qalaı qorǵaýǵa bolady?
- Zańdy bilińiz. Zań týraly aqparattylyq — óz quqyqtaryńyzdy qorǵaýdyń basty quraly. Eger satýshy qosymsha taýarlar men qyzmetterdi mindettese, oǵan «Tutynýshylardyń quqyqtaryn qorǵaý týraly» Zańnyń 28-babyn eske salyńyz.
- Jazbasha rastaýyn talap etińiz. Satýshydan qosymsha qyzmetterdi nemese taýarlardy satyp alý talabyn chekke nemese kelisimshartqa tirkeýdi surańyz. Bul shaǵym bergen kezde dálel bola alady.
- Kómek surańyz. Quqyqtaryńyz buzylǵan jaǵdaıda, Tutynýshylar quqyqtaryn qorǵaý komıtetine nemese onyń óńirlik Departamentterine júginińiz. Sondaı-aq, eOtinish qosymshasy arqyly nemese jedel jeli nómirine qońyraý shalyp, shaǵym bere alasyz.
«Mindettelgen qyzmetter adal saýda qaǵıdattaryn buzady. Tek zańdy saqtaý jáne ashyq erejelerdi ustaný ǵana tutynýshylar men bıznestiń arasyndaǵy senimdi nyǵaıta alady. Bul úshin eki taraptyń da jaýapkershiligi mańyzdy: satýshylar tutynýshylardyń quqyqtaryn qurmetteýi kerek, al tutynýshylar óz quqyqtaryn bilip, qorǵaýdan taıynbaýy tıis. Satýshylar este ustaýy qajet: tutynýshylardyń quqyqtaryn qurmetteı otyryp, olar tek zań talaptaryn oryndap qoımaı, óz bedelin de arttyrady. Al tutynýshylar zańdy túsinip, óz quqyqtaryn qorǵaýdy úırense, ár satyp alýy tıimdi ári ádiletti bolary sózsiz», — dep atap ótti bas maman Ardaq Ómirbek.