Dúkendegi azyq-túliktiń neshe paıyzy otandyq óndirýshilerge tıesili bolýy kerek
ASTANA. KAZINFORM — Qazirgi kezde elimizdegi dúken sórelerindegi azyq-túliktiń neshe paıyzy otandyq óndirýshilerge tıesili? Bul suraqqa QR Saýda jáne ıntegratsııa mınıstrligi jaýap berdi.
- Qazirgi kezde ishki saýda erejelerine sáıkes, saýda jelilerinde jáne bazarlarda otandyq taýar óndirýshilerdiń azyq-túlik taýarlary keminde 30% kóleminde ornalastyrylýy tıis. 2024 jylǵy 6 sáýirdegi Zańǵa sáıkes, mınıstrlik ishki saýda sýbektilerine memlekettik qoldaý kórsetý jónindegi ókilettikterge ıe. Osy zańdy iske asyrý úshin vedomstvo ishki saýda sýbektilerinde jeke kásipkerlikti memlekettik qoldaý kórsetý erejelerin qabyldady, onda memlekettik qoldaý alǵan uıymdar úshin 20% azyq-túlik jáne 20% azyq-túlik emes otandyq taýarlardyń sórelik orynǵa ornalastyrylýy týraly mindettemeler saqtaldy. Osylaısha, ishki saýda sýbektileri otandyq azyq-túlik taýarlaryn sórelerde 50%-ǵa deıin (ishki saýda erejeleri boıynsha 30% jáne oǵan qosa memlekettik qoldaý erejeleri boıynsha 20%) ornalastyrýy qajet, al otandyq turmystyq taýarlar 20 paıyzdan kem emes bolýy tıis, - delingen mınıstrliktiń Kazinform agenttigine bergen jaýabynda.
Sonymen qatar, ishki saýda erejelerine sáıkes, ishki saýda sýbektileri otandyq ónimderdiń sórelerde ornalasý oryndaryn arnaıy belgilermen nemese «Qazaqstanda jasalǵan» jazýymen aıqyndaýy tıis. Otandyq ónimderdi halyq arasynda keńinen suranysy bar taýarlarmen qatar «kross-merchendaızıng» ádisimen ornalastyrý kerek. Munymen qosa, olardy kózge kórinetin jáne qolǵa ońaı alýǵa bolatyn oryndarǵa qoıý kerek. Otandyq taýar óndirýshilerdi qoldaý maqsatynda 2023-2024 jyldary memlekettik «Qazaqstanda jasalǵan» jol kartasy júzege asyryldy. Bul jol kartasy aıasynda jármeńkeler men arnaıy kórmeler uıymdastyryldy.
- Qazaqstandyq óndirýshilerdiń oń ımıdjin qalyptastyrý úshin aqparattyq naýqandar ótkizilip, «Qazaqstanda jasalǵan» tańbasy bar ónimderdiń sapasy men qaýipsizdigi týraly oń pikir qalyptastyrýǵa baǵyttalǵan sharalar turaqty túrde atqarylyp jatyr. 2023 jyly Saýda jáne ıntegratsııa mınıstrligi saýda jelileri men iri saýda obektilerinde taýarlardy jetkizý boıynsha kelisimshart jasaýǵa nemese kelisimshart jasalǵan jaǵdaıda olardyń dıskrımınatsııalyq sıpatyn anyqtaý maqsatynda tekserýler júrgizý quqyǵyna ıe boldy. Otandyq taýarlardyń saýda sórelerine jetkizilýin baqylaý turaqty júrgizip keledi, onyń ishinde áleýmettik mańyzy bar azyq-túlik taýarlaryna da monıtorıng jasalady, - dep atalyp ótken vedomstvo aqparatynda.
Budan buryn habarlanǵandaı, jaqynda EXPO Halyqaralyq kórme ortalyǵynda «Ulttyq ónim» VIII otandyq óndirýshiler kórmesi ótti. Úsh kún boıy kórmede Qazaqstannyń barlyq óńirinen 350 óndirýshi qatysyp, óz ónimderin usyndy.
Eske salsaq, bıyl Májilis depýtaty Nurtaı Sabılıanov ımporttyq taýarlarǵa «Qazaqstanda jasalǵan» degen sertıfıkattar berilgenin aıtyp, osy jaǵdaıdy synǵa alǵan edi.