Dúkende azyq-túlik baǵasynyń jazylmaı turýy zańdy ma

ÓSKEMEN. QazAqparat – ShQO Saýda jáne tutynýshylardyń quqyǵyn qorǵaý departamenti «Saýda oryndarynda azyq-túlik baǵasynyń jazylmaı turýy qanshalyqty zańdy?» degen saýalǵa jaýap berdi, dep habarlaıdy QazAqparat tilshisi.

Keıbir dúkender men bazarlarda sórege qoıylǵan azyq-túliktiń baǵasy jazylmaı turady. Al keı jaǵdaılarda baǵasy jazylyp turǵanymen, kassaǵa kelgende satýshy onyń qymbatyraq ekenin aıtyp jatady. Bunyń qanshalyqty zańdy ekendigin ShQO Saýda jáne tutynýshylardyń quqyǵyn qorǵaý departamenti basshysynyń orynbasary Qanat Jeńisbekuly aıtyp berdi.

«Taýarlarda baǵa belgileriniń bolmaýy – tutynýshylardyń quqyǵyn buzý. Atalǵan quqyq buzýshylyqty jasaǵandar QR Saýda qyzmetin retteý týraly zańnamanyń 193-babynyń 4-bóligine sáıkes jaýapqa tartylady. Bul bap boıynsha shaǵyn kásipkerlik sýbektilerine – 6 AEK (20 700 teńge), orta kásipkerlik sýbektilerine – 10 AEK (34 500 teńge), iri kásipkerlik sýbektilerine – 30 AEK (103 500 teńge) mólsherinde aıyppul salynady», - deıdi ol.

Al satýshynyń azyq-túlikti kórsetilgen baǵadan qymbatyraq satýy – «Tutynýshylardyń quqyǵyn qorǵaý týraly» zańnyń 24-babyn óreskel buzý. Osyndaı jaǵdaıǵa tap bolǵan óńir turǵyndary Saýda jáne tutynýshylardyń quqyǵyn qorǵaý departamentine shaǵymdana alady.