Dúkenbaı Dosjannyń «Jibek joly» romany Berlınde ekinshi ret nemis tilinde basylyp shyqty
Bul tarıhı shyǵarmanyń alǵashqy aýdarmasyn 1987 jyly «Volk und Welt» baspasy shyǵarǵan bolatyn. Onyń kórkemdik júıesi, psıhologııalyq astary men kóshpeliler órkenıeti qundylyǵynyń syryn ashqan qyrlaryn joǵary baǵalaǵan mádenıettanýshy, aýdarma sheberleri Leo Koshýt jáne Rapreht Vılnoý týyndyny qaıtadan jańǵyrta aýdarǵan. Bul joly roman «Verlag Hans Schiler» baspasynan 3 myń danamen jaryq kórip otyr. Qazaq ádebıetiniń kórnekti ókilderin eýropaǵa tanytýdy maqsat tutqan bul sharaǵa demeýshilik jasaǵan - QR Syrtqy ister mınıstrligi. Aıta keter jaıt, buǵan deıin Germanııada Ábish Kekilbaev, Muhtar Maǵaýın sekildi qazaq klassıkteriniń shyǵarmalary nemis tildi oqyrmannyń nazaryna usynylǵan bolatyn.
Jalpy Dúkenbaı Dosjannyń 1973 jyly qazaq tilinde jaryq kórgen «Jibek joly» romany buǵan deıin orys, ýkraın, majar, mońǵol, pýshtýn tilderine aýdarylyp, 350 myń dana taralymmen álemge taralǵan edi.
9 qyrkúıekte 71 jasqa tolǵaly otyrǵan áıgili qalamger, eńbek jolyn 1963-56 jyldary «Jetisý» gazetinde ádebı qyzmetkeri bolyp bastap, 1966-1975 jyldary «Jazýshy» baspasynda aǵa redaktor, 1976-1984 jyldary Qazaq KSR Baspa, Polıgrafııa jáne kitap saýdasy isteri jónindegi memlekettik komıtetiniń bólim meńgerýshisi qyzmetin atqardy.
1964 jyly alǵashqy óleńder jınaǵyn jaryqqa shyǵarǵan jazýshy keıin 8 roman, 18 povest jáne 100-den astam áńgimeniń avtory atandy. Shyǵarmalary álemniń 19 tiline aýdarylyp, 1974 jyly «Zaýal» kitaby úshin «Molodaıa gvardııa» baspasynyń «Qazirgi zamanǵy jaqsy roman» syılyǵyn, 1988 jyly Ýkraınanyń «Dnepro» baspasynan shyqqan «Jibek joly» romany úshin «Tarıhı taqyryptaǵy jaqsy kitap» syılyǵyn, 1987 jyly M.Áýezov atyndaǵy ulttyq syılyqtyń, al «Qum kitaby» úshin 1996 jyly QR Memlekettik syılyǵyn ıelendi.