Dúken termınaldarynda memlekettik qyzmettiń qaı túrin alýǵa bolady
«Ulttyq aqparattyq tehnologııalar» AQ málimetine sáıkes, osyndaı 15 myń termınal bar. Sonyń arqasynda dúkende, sýperamerkette memlekettik qyzmettiń bes túrin jyldam alýǵa bolady. Biraq ol úshin mobıldi azamattar bazasynda tirkelip, jeke kabınetti ashý qajet.
«Ulttyq aqparattyq tehnologııalar» AQ tóraǵasynyń orynbasary Dáýlet Bekmanovtyń aıtýynsha, búginde memlekettik qyzmetterdiń biraz bóligi elektrondy formatqa aýystyryldy. Endigi maqsat - atalǵan qyzmetterdiń arnalaryn keńeıtý. Osyǵan oraı, birneshe memlekettik qyzmetti atalmysh termınaldar arqyly iske qosý týraly sheshim qabyldandy. «Máselen, termınaldar arqyly mekenjaı anyqtamasyn, adamnyń sotty bolǵany týraly qujatty, zeınetaqy jáne jyljymaıtyn múlik týraly anyqtamalardy alýǵa bolady. Endi, termınal ony qaǵaz túrinde basyp bermeıdi. Sol jerden kez kelgen adam ózine qajetti bes qujattyń bireýin elektrondy poshtasyna jibere alady. Sóıtip, úıge baryp, basyp shyǵarýǵa bolady», - dedi D.Bekmanov QazAqparat tilshisi.
Aıta keteıik, «Ulttyq aqparattyq tehnologııalar» AQ jeke qujattardyń elektrondy qoımasyn iske qosýdy kózdeıdi. Budan bólek, birneshe fýnktsııa básekelestik ortaǵa beriledi. Sonyń ishinde 1414 baılanys ortalyqtary da bar.
