Dúken sórelerinen densaýlyqqa qaýipti shujyqtar anyqtaldy - komıtet

ASTANA. QazAqparat - QR Densaýlyq saqtaý mınıstrligi Qoǵamdyq densaýlyq saqtaý komıteti elimizdegi saýda nysandarynda tehnıkalyq talaptarǵa saı kelmeıtin shujyq ónimderin anyqtap jatyr, dep habarlaıdy QazAqparat tilshisi.

«Elimizdegi tamaq ónimderiniń qaýipsizdigin baqylaý aıasynda shujyq ónimderiniń 1241 synamasyna saraptama júrgizildi, onyń ishinde 285 shujyq ónimi tehnıkalyq reglament talaptaryna saı kelmedi», - delingen Qoǵamdyq densaýlyq saqtaý komıtetiniń baspasóz qyzmeti jibergen habarlamada.

Komıtettiń habarlaýynsha, «Taǵamdyq qospalardyń, hosh ıistendirgishterdiń jáne tehnologııalyq qosymsha zattardyń qaýipsizdik talaptary» tehnıkalyq reglamenti talaptaryna sáıkes shujyq ónimindegi natrıı nıtraty 50 mg/kg aspaýy tıis. Al, Petropavl qalasynyń «Severnyı» sýpermarketinde reseılik «Starodvorskıe kolbasy» JAQ «Doktorskaıa» shujyǵynan (óndirilgen kúni - 2018 jylǵy 14 maýsym) 66,6 mg/kg natrıı nıtrıti  tabylǵan.

Qyzyljar aýdanynyń Teplıchnoe aýylyndaǵy «Ýıýt» dúkeninde «Omskıı bekon» AQ «POPÝLıARNAıA» pisirilgen shujyǵynda  (óndirilgen kúni - 2018 jylǵy 31 mamyr) 60,6 mg/kg natrıı nıtrıti anyqtalǵan. Sondaı-aq, Jambyl aýdanynyń Presnovka selosyndaǵy «Sova» dúkeninde «Omskıı bekon» AQ óndirgen «Býterbrodnaıa» pisirilgen shujyǵy (óndirilgen kúni - 2018 jylǵy 11 maýsym, natrıı nıtrıtiniń quramy - 109,8 mg/kg), «Pohodnaıa» jartylaı súrlengen shujyǵy (óndirilgen kúni - 2018 jylǵy 15 maýsym, natrıı nıtrıtiniń quramy - 72 mg/kg) talaptarǵa saı kelmegen.

Joǵaryda atalǵan tártip buzýshylyqtardan basqa, «Omskıı bekon» AQ «ıÝjnaıa», «Selskaıa» jáne Zarechnaıa shujyqtarynan  levomıtsetınniń artyq mólsheri anyqtalǵan. «Tamaq ónimderiniń qaýipsizdik talaptary» tehnıkalyq reglament talaptaryna sáıkes, shujyq ónimderindegi levomıtsetınniń deńgeıi 0,01 mg/kg aspaýy tıis. 

«Quramyndaǵy natrıı nıtrıtteri men antıbıotıkteri, ıaǵnı levomıtsıni joǵary tamaqty qoldaný kezinde adamnyń densaýlyǵynyń tómendeýi baıqalýy múmkin. Osylaısha, nıtrıtter adamnyń qanymen aralasyp, nátıjesinde metemoglobın dep atalatyn zat paıda bolyp, otteginiń almasýyna kedergi keltiredi, ol otteginiń jetispeýshiligine (gıpoksııa) alyp keledi. Gıpoksııa adam boıynda álsizdik, ózin nashar seziný, uıqyshyldyq, qusý, júıke júıesi, júrek fýnktsııasynyń, búırek pen baýyr tinderiniń buzylýyn týdyrady», - delingen Qoǵamdyq densaýlyq saqtaý komıtetiniń baspasóz baıanynda.