Dýglas Jýnıor fýtzaldan Qazaqstan quramasyndaǵy mansabyn aıaqtady

ASTANA. KAZINFORM — Fýtzaldan Qazaqstan quramasynyń qorǵaýshysy Dýglas Jýnıor ulttyq qurama sapyndaǵy mansabyn aıaqtaǵanyn málimdedi.

Bul jóninde áleýmettik jelide beınejazba jarııalady. 

— Ótken 10 jylymda kásibı de, jeke ómirimde janymda bolǵan barlyq adamdarǵa alǵys aıtamyn. Bul meniń mansabymdaǵy eń keremet 10 jyl boldy, buǵan eshqandaı kúmán joq! 2014 jyly meni shaqyrǵan Kakaýǵa, senim bildirgen Qaırat Orazbekov pen Andreı Mışenkoǵa, keıin jumysty jalǵastyrǵan Kakaǵa, sondaı-aq quramadaǵy jergilikti jigitterge jyly qabyldaǵandary úshin raqmet. Alǵashqy Bosnııaǵa qarsy ótken tusaýkeser oıynymnan (4:2 jeńispen aıaqtaldy, men 2 gol soqtym) — men osy quramamen birge talaı jaqsy sátterge kýá bolatynymyzǵa jáne tarıh jazatynymyzǵa senimdi boldym, — dedi ol.

Dýglas Jýnıor 1988 jyly Brazılııada dúnıege kelgen. Ol sporttyq mansabyn óz elindegi ABS komandasynda bastasa, odan keıin Chehııanyń «Era-Pak» (Hrýdım) komandasynda jalǵastyrdy. 2014-2024 jyldary qazaqstandyq «Qaırat» komandasynda oıyn kórsetip, 2022 jyly reseılik KPRF klýbynda jalǵa berildi. Ótken jyldan bastap Saýd Arabııasynyń «Al-Ýla» klýbynyń namysyn qorǵap keledi.

Eske salsaq, fýtzaldan Qazaqstan quramasy Eýropa chempıonatyna fınaldyq satysynan tys qaldy.