Dýblınde Qazaqstan jáne Irlandııa yntymaqtastyǵyn keńeıtý máselesi talqylandy
ASTANA. QazAqparat - 22-24 maýsymda Qazaqstan Elshisi Erjan Qazyhanovtyń Irlandııaǵa sapary bolyp ótti, dep habarlady QR SІM baspasóz qyzmetinen.
Sapardyń maqsaty - Qazaqstan jáne Irlandııa yntymaqtastyǵyn keńeıtý, Qazaqstan ekonomıkasyna jańa ınvestıtsııalar tartý, birlesken ekonomıkalyq jáne mádenı-gýmanıtarlyq jobalardy júzege asyrýǵa múmkindikter jasaý boldy.
Sapar barysynda Elshi E. Qazyhanov Irlandııa Prezıdenti M. Hıggınske senim gramotasyn tapsyryp, Qazaqstan Respýblıkasynyń Prezıdenti N.Á. Nazarbaevtyń sálemin jetkizdi.
Irlandııa basshysymen kezdesý kezinde Qazaqstan Elshisi eki el arasyndaǵy baılanystardy keńeıtýdiń jáne nyǵaıtýdyń mańyzdylyǵyn ataı kele, olardy ekijaqty quqyqtyq bazany keńeıtý arqyly iske asyrýǵa bolatyndyǵyna toqtaldy. Ol eki memleket arasyndaǵy yntymaqtastyqtyń ekonomıkalyq jáne saıası áleýetiniń joǵary ekendigin erekshe atap ótti.
Dýblınge sapar aıasynda Elshi E. Qazyhanov Irlandııa aýyl sharýashylyǵy mınıstri S. Kovenımen, Irlandııa syrtqy ister mınıstrliginiń Bas hatshysy N. Berdjesspen jáne saıası dırektory B. Robınsonmen, Irlandııa Parlamenti halyqaralyq ister jáne saýda jónindegi Birikken komıtetiniń tóraǵasy P. Brınmen jáne Irlandııanyń isker toptar ókilderimen birqatar kezdesýler ótkizdi.
