«Dýblın» men «Vashıngton»: Súriletin úıdiń úleskerleriniń aqshasyn kompanııa qaıtarýy tıis

ASTANA. QazAqparat – Astana qalalyq ádilet departamenti basshysynyń orynbasary Azamat Berdibekov elordada súriletin «Dýblın» jáne «Vashıngton» turǵyn úı keshenderine úlesker bolǵan azamattardyń aqshasyn kim qaıtaratynyn túsindirdi, dep habarlaıdy QazAqparat tilshisi.

«Úleskerlerdiń quqyǵy kompanııamen jasalǵan shartta kórsetilgen. Azamattar kelisimdi buzýǵa nemese ýákiletti organga júginýge quqyly. Tıisinshe, olar ózderiniń aqshasyn qaıtaryp ala alady», - dep túsindirdi Azamat Berdibekov.

Onyń aıtýynsha, úleskerlerge ákimdik nemese ózge de jaýapty organ ótemaqy tóleýge mindetti emes.

Aqshany «Dýblın» jáne «Vashıngton» turǵyn úı keshenderin salǵan kompanııa qaıtarýǵa tıis.

«Osy oraıda G Park kompanııasyna tıesili «Vashıngton» turǵyn úı keshenine qatysty túsindirme bere ketsem. Ol úı boıynsha sot sheshimi áli zańdy kúshine engen joq. Astana qalasynyń mamandandyrylǵan aýdanaralyq ekonomıkalyq soty 6 sáýir kúni sheshim shyǵardy. Ol ádilet organdaryna kelip tústi. Tıisinshe biz ony dereý oryndaýǵa tıispiz. Qazirgi ýaqytta «Vashıngton» turǵyn úıin súrýge qatysty talaptardyń oryndalmaýyna baılanysty kompanııa atyna ákimshilik hattama toltyryldy. Ákimshilik sot kompanııany kináli dep tanydy. Eger aıyppuldy tólemese, onda zańǵa saı ár kún úshin ósimpul tóleıdi, oǵan qosa úı mindetti túrde súriledi», - dedi departament basshysynyń orynbasary.

Aıta keteıik, búgin jelilerde elordada zańsyz salynǵan «Dýblın» turǵyn úı keshenin súrýge barǵan mamandarǵa qurylys kompanııasynyń qyzmetkeri kedergi keltirgeni jaıly vıdeo tarady.

Buǵan qatysty túsinikteme bergen ádilet departamentiniń ókili úı qandaı jaǵdaı bolsa da súriletinin aıtty.

Sondaı-aq, mamandarǵa kedergi keltirgen aýyr tehnıkanyń júrgizýshisine qatysty ákimshilik jaza qoldanyldy.