Dýbaıdyń bas múftıi Qurban aıt merekesiniń 26 qazanda bastalatynyn jarııalady
ÁBÝ-DABI. 16 qazan. QazAqparat - BAÁ Dýbaı ámirliginiń bas múftıi aǵymdaǵy jyly musylmandardyń Arafa kúni merekesi 25-shi qazan kúni bolatynyn, al kelesi kúni, jumada, Qurban Aıttyń birinshi kúni merekelenetinin jarııalady.
Buǵan deıin arab baspasózinde Saýd Arabııasynyń Arafa kúnin jarııalaýy tıis kún týraly qarama-qaıshy málimetter shyqqan edi. Musylmandar kúntizbesiniń 12-shi aıy - Zúlhıja aıynyń 9-shy kúnine saı keletin kıeli Qajylyqtyń ekinshi kúnin bir derekkózder sársenbide atap ótiletinin habarlasa, basqalary onyń beısenbi kúni ótkiziletinin habarlady.
Dýbaıdyń bas múftıi doktor Ahmed Ábdel Ázız Ál Haddad merekelerdiń kúnderine baılanysty eshqandaı kúmán bolmaýy tıis dep habarlady. «Saýd Arabııasy erteń, 17 qazan kúni musylmandardyń Zúlhıja aı kúntizbesiniń birinshi kúni bastalatynyn jarııalady, osyǵan sáıkes Arafa kúni kelesi aptanyń beısenbisine keledi», - dedi ol.
Arab áleminde merekelerdiń bastalý kúnin kóp adam kútti. Osylaısha, bıyl eki mıllıonnan astam adam kıeli Qajylyq saparyna attaný úshin onyń bastalýyn kútýde, sonyń ishinde bes myńǵa jýyq qazaqstandyq azamat bar. Birikken Arab Ámirlikteriniń memlekettik organdary «Qurban aıt» merekesine baılanysty qyzmetkerlerge úshkúndik demalys kúnderin jarııalady, Saýd Arabııasynda halyq jeti kún demalady. Mereke kúnderi Dýbaıdyń saýda ortalyqtary kúndiz-túni demalyssyz jumys isteıtinin jarııalady, osyǵan oraı BAÁ-ge kelýshi týrıster mereke kezinde saýda oryndaryn qolaıly ýaqytta aralaı alady.
