Dýbaıdan ushyp kelgen 2 qazaqstandyqtan koronavırýs anyqtaldy
NUR-SULTAN. QazAqparat - 13 qańtar kúni Qazaqstan aýmaǵyna Germanııa, Nıderlandy, Koreı, Maldıv, BAÁ, Mysyr, Túrkııa, RF, Belarýs jáne Ózbekstan elderinen 16 halyqaralyq áýe reısi ushyp keldi, dep habarlaıdy QazAqparat.
QR Densaýlyq saqtaý mınıstrligi Sanıtarııalyq-epıdemıologııalyq baqylaý komıtetinen málim etkendeı, Qazaqstanǵa barlyǵy 1 379 jolaýshy ushyp kelgen. Onyń 1 190-ynda koronavırýsqa PTR-testileýdiń teris nátıjesi bar anyqtama bolǵan, 189 adam anyqtamasyz kelgen, olardyń barlyǵy QR azamattary.
Atap aıtqanda,
- Almaty qalasynyń áýejaıyna – 6 reıs qonǵan, barlyǵy 610 jolaýshy, onyń ishinde anyqtamamen - 570, anyqtamasyz - 40;
- Nur-Sultan qalasynyń áýejaıyna – 5 reıs, 540 jolaýshy, anyqtamamen – 391, anyqtamasyz - 149;
- Atyraý qalasynyń áýejaıyna – 1 reıs, 132 jolaýshy anyqtamamen keldi;
- Oral qalasynyń áýejaıyna – 1 reıs, 97 jolaýshy anyqtamamen keldi.
«Anyqtamasyz kelgen Qazaqstan azamattary kelgen jerleri boıynsha COVID-19-ǵa PTR-taldaý ádisimen testilendi jáne karantındik statsıonarlarda óz nátıjelerin kútýde», - delingen aqparatta.
Sondaı-aq málim etilgendeı, 12 qańtar kúni Qazaqstanǵa PTR anyqtamasyz ushyp kelgen Qazaqstannyń 94 azamatynyń test náıjeleri daıyn boldy. Oǵan sáıkes, «Dýbaı – Almaty» reısiniń 2 jolaýshysynan koronavırýs ınfektsııasy anyqtaldy.
