Dýbaıdan Tel-Avıvke ushqan reıs apattyq sıgnal berdi, Izraıl joıǵysh ushaqtardy kóterdi
ASTANA. KAZINFORM — Oqıǵanyń mán-jaıyn qaýipsizdik qyzmetteri anyqtap jatyr, dep habarlaıdy Kazinform agenttiginiń menshikti tilshisi.
Flydubai áýe kompanııasynyń Dýbaıdan Tel-Avıvke baǵyt alǵan ushaǵy 30 qyrkúıek kúni tańerteń apattyq sıgnal berip, Saýd Arabııasy áýe keńistiginde baǵytyn ózgertken.
The Times of Israel basylymy qaýipsizdik qyzmetterindegi derekkózderge silteme jasap, Izraıl áýe keńistigine joıǵysh ushaqtaryn kótergenin habarlady. Ázirge jolaýshylar ushaǵyn basyp alý týraly aqparat resmı túrde rastalǵan joq.
Basylymnyń málimetinshe, ushaq aldymen jalpy tótenshe jaǵdaıdy bildiretin 7700 kodyn, keıin ushaqty basyp alý nemese zańsyz aralasý jaǵdaıynda qoldanylatyn 7500 kodyn jibergen. Flightradar24 servısi 7700 kodynyń berilgenin rastady. Alaıda sıgnaldyń naqty sebebi ázirge belgisiz.
Izraıldiń «Vestı» basylymy ushaq bortynda 174 jolaýshy baryn habarlady. Izraıl qaýipsizdik qyzmetterindegi derekkózdiń aıtýynsha, apattyq sıgnaldyń berilýi ushaqtyń basyp alynǵanyn bildirmeıdi.
— Ushaqtyń basyp alynǵany týraly naqty aqparat joq. Ázirge ushqysh apattyq sıgnal bergeni belgili. Ushqyshpen baılanys ornatý múmkin bolmaı tur, bul alańdatyp otyr, — dep habarlady derekkóz.
FZ1073 reısi Tel-Avıv mańyndaǵy Ben-Gýrıon áýejaıyna jergilikti ýaqyt saǵat 09:10–da (Astana ýaqytymen 11:10) qonýǵa tıis bolǵan.
Izraıldik BAQ málimetinshe, ushaq bıiktigin tómendetip, baǵytyn Saýd Arabııasy jaǵyna ózgertken. Ushaqtyń qonǵany týraly ázirge aqparat joq.
Izraıl premer-mınıstri Bınıamın Netanıahý men Qorǵanys mınıstri Israel Kats qaýipsizdik máselesine qatysty shuǵyl keńes ótkizip jatyr.
Buǵan deıin Saýd Arabııasy Iemenge áýeden bir táýlikte 35 soqqy jasaǵany habarlanǵan bolatyn.
