Dýbaıdaǵy týrnır: Rybakına úshinshi sette matchty jalǵastyrýdan bas tartty

ASTANA. KAZINFORM – Qazaqstannyń birinshi, álemniń 3-raketkasy Elena Rybakına Dýbaı WTA 1000 týrnıriniń shırek fınalynan tys qaldy. 

Jarystyń 1-raketkasy bolyp tirkelgen qazaqstandyq tennısshi úshinshi aınalymda reıtıngide 67-oryndaǵy horvatııalyq Antonııa Rýjıchpen betpe-bet keldi. Bul qos tennısshiniń ózara alǵashqy kezdesýi edi.

Dodaǵa arnaıy shaqyrtý alǵan A.Rýjıch alǵashqy aınalymda álemniń 25-raketkasy, 2021 jylǵy AQSh chempıonatynyń jeńimpazy, ulybrıtanııalyq Emma Radýkanýdy jeńip ketken bolatyn – 6:1, 5:7, 6:2. 

Horvatııalyq tennısshi matchty sátti bastaǵanymen, Rybakına tarazy basyn teńestirdi – 3:3. Sodan keıin sportshylar breıkpen almasty – 4:4. Jıi qatelesip, oıyny júrmese de, Elena setti taǵy bir breıkpen aıaqtady – 7:5. 

Ekinshi partııada da Rýjıch 3:1 esebimen alǵa ketti. Oǵan bul joly bir breık jetkilikti boldy – 6:4. Úshinshi sette Rýjıch 1:0 esebimen alda turǵan mezette Rybakına medıtsınalyq brıgadany shaqyryp, aqyldasqannan keıin matchty jalǵastyrýdan bas tartty. 

Bir saǵat 37 mınýtqa sozylǵan básekede Rybakına 10 eıspen birge 5 breık-poınttyń úsheýin paıdalandy. Rýjıch 4 eıs, 4 breıkpen (13 breık-poınt) kózge tústi. 

Horvatııalyq tennısshi jartylaı fınalǵa shyǵý úshin álemniń 9-raketkasy, ýkraınalyq Elına Svıtolına nemese reıtıngide 13-satydaǵy shveıtsarııalyq Belında Benchıchtiń qaı jeńgenimen talasady. Bulardyń ekeýi de – myqty tennısshiler. 

Ótken jyly Rybakına Dýbaıda jartylaı fınalǵa deıin jetken edi. Bıyl sol jarysta alǵan upaıyn qorǵaı almady.

Eske sala keteıik, budan buryn Elena Rybakınanyń Dýbaıdaǵy týrnırdiń úshinshi aınalymyna shyqqanyn jazǵan edik. 

Sondaı-aq Anna Danılına Dýbaıdaǵy týrnırdiń shırek fınalyna joldama aldy.