Dýbaıdaǵy Michelin Guide 2026 gıdine 122 meıramhana endi
ASTANA. KAZINFORM – Dýbaıda Michelin juldyzdaryn tapsyrý rásimi besinshi ret ótip, nátıjesinde 122 meıramhanany qamtyǵan Michelin Guide Dubai 2026 gıdi tanystyryldy. Bir juldyzǵa ıe bolǵan jańa meıramhanalardyń qatarynda túrikmenstandyq aspaz negizin qalaǵan mekeme de bar. Bul týraly Kazinform agenttigi Orient.tm basylymyna silteme jasap habarlaıdy.
Meıramhana 2025 jylǵy aqpanda Dýbaıdyń halyqaralyq qarjy ortalyǵynda ashylǵan. Munda túrli gastronomııalyq dástúrler men bas aspaz Arslan Berdıevtiń túrikmen murasynyń elementterin ushtastyratyn avtorlyq taǵamdar usynylady.
Michelin sarapshylary Berdıevtiń túrikmendik tamyryna, saıahattaryna jáne sapaly ónimdermen jumys isteýine arnaıy nazar aýdarǵan.
Bul meıramhana Michelin juldyzyna alǵash ret ıe bolǵan eki mekemeniń biri boldy. 2026 jylǵy gıdke engen Dýbaıdyń 14 meıramhanasy bir juldyzben marapattalǵan.
Meıramhana tujyrymdamasynyń negizinde tek qymbat nemese sırek kezdesetin ónimderdi paıdalaný emes, taǵam ázirleý tehnıkasyna, ýaqytqa jáne qarapaıym ıngredıentterdiń ózinen erekshe dám shyǵara bilýge mán berý jatyr.
Michelin juldyzy gastronomııa salasyndaǵy eń bedeldi halyqaralyq marapattardyń biri sanalady. Ol meıramhanalarǵa as máziriniń joǵary sapasy, taǵam ázirleý sheberligi, dámderdiń úılesimdiligi, aspazdyq tujyrymdamanyń ereksheligi jáne taǵam sapasynyń turaqtylyǵy úshin beriledi.
Qazaqstanda AJISEN RAMEN meıramhanalar jelisin damytý kózdelip otyr.
