Dýbaıdaǵy kórme: Ekologııa vıtse-mınıstri kýáger retinde jaýap berdi
ASTANA. KAZINFORM – Ekologııa jáne tabıǵı resýrstar mınıstri Erlan Nysanbaev Dýbaıdaǵy kórmeden keıin vedomstvodaǵy qyzmetkerge qatysty tergeý amaldary boıynsha pikir bildirdi.
Búgin Senatta ornyqty damý salasyna qatysty otyrystan keıin tilshiler mınıstrden tergeý amaldary aıasynda vıtse-mınıstr Mansur Oshýrbaevtyń statýsyna qatysty surady.
«Dýbaıdaǵy Qazaqstan pavılonynyń daıyndalýyn tekserý aıasynda onyń kabınetindegi qujattar alyndy. Qazir odan kýáger retinde jaýap alynyp jatyr», - dedi E. Nysanbaev.
Onyń aıtýynsha, vıtse-mınıstrge aıyp taǵylmaǵan.
«Qazir ol jumysyn jalǵastyryp keledi. Tergeý qorytyndysy boıynsha shara qabyldanady. Ol kýáger retinde jaýap berip, tergeý amaldaryna atsalysyp jatyr», - dedi Ekologııa mınıstri.
Eske salsaq, bıyl aqpan aıynyń basynda Sybaılas jemqorlyqqa qarsy qyzmet Ekologııa jáne tabıǵı resýrstar mınıstrliginiń qyzmetkerlerine qatysty tergeý júrip jatqanyn rastady.
Buǵan deıin Ekologııa mınıstrliginiń Dýbaıda ótken kórmege qatysýy kezinde birqatar zańbuzýshylyq anyqtalyp, laýazymdy tulǵalar ustalǵany jaıly ınsaıderlik habar taraǵan edi.
Ekologııa jáne tabıǵı resýrstar mınıstrliginen habarlaǵandaı, vedomstvo BUU klımattyń ózgerýi jónindegi negizdemelik konventsııasy taraptarynyń 28-shi konferentsııasyn ótkizýge jumsalǵan shyǵynǵa qatysty ishki aýdıt júrgizgen.
