Dýbaıda júrgizýshisiz áýe taksıi shyǵarylady
ASTANA. QazAqparat - Dýbaı áýe keńistiginde jýyq arada kóliktiń erekshe túri - júrgizýshisiz basqarylatyn taksıler paıda bolady. 6-shy Búkilálemdik úkimettik sammıtte osyndaı joba tanystyryldy, dep habarlaıdy TASS.
Sharaǵa 140 elden kelgen 4 myńnan astam delegat qatysýda. Taksıdiń jańa túrin shyǵarý bastamasyn Germanııanyń Volocopter kompanııasyna yntymaqtastyq jasaýdy usynǵan Dýbaı jol jáne kólik basqarmasy kóterdi.
Joba avtorlarynyń aıtýynsha, Dýbaıdyń áýe taksıleri - kóliktiń ekologııalyq taza túri. Ol elektrmen jumys isteıtin bolady. Jobaǵa sáıkes, ushý uzaqtyǵy 30 mınýttan, jyldamdyǵy saǵatyna 100 kılometrden, al bıiktigi 2 myń metrden aspaıdy.
Áýe taksılerin shyǵarý Dýbaı bıliginiń qoǵamdyq ómirge sony tehnologııalardy engizý jónindegi aýqymdy josparynyń quramdas bóligi bolmaq.
Budan buryn BAÁ premer-mınıstri jáne Dýbaı ámiri sheıh Muhammed bın Ráshıd ál-Maktým 2030 jylǵa qaraı qaladaǵy ózdiginen júretin kólik quraldary 25%-ǵa jetetinin málimdegen bolatyn.
