Dýbaıda turatyn Vasılıı Jırov Qazaqstanǵa nege kelgishtep júr
ASTANA. KAZINFORM – Qazaqstannyń tuńǵysh Olımpıada chempıony, kásipqoı rıngte IBF tujyrymy boıynsha álem chempıony ataǵyn ıelengen Vasılıı Jırov Qazaqstanǵa jıi kelýiniń sebebin aıtty.
Sportshy Sports.kz saıtyna bergen suhbatynda elge kóbine óz bastamasymen kelip júrgenin jasyrmady. Keıde aldyn ala kelisimmen de saparlaıdy.
«Jumys usynǵan joq, ázirge tek áńgime deńgeıinde», – dedi Jırov.
Sońǵy jarty jyl boıy issaparda júrgen Olımpıada júldegeri qazaqstandyq boksshylardyń barlyq jekpe-jekterin kóre almaǵanymen, jalpykomandalyq tabysty «bizdiń jigitterdiń úlken qulshynysymen» baılanystyrdy.
Erler quramasynyń Ózbekstannan utylýyna toqtalǵan ol «fýnktsıonaldyq daıyndyǵy men tehnıko-taktıkalyq jumysty kúsheıtý qajet» ekenin alǵa tartty.
«Boksshylar kez kelgen stılge daıyn bolýy tıis jáne qarsylas qandaı tásil usynsa da, óz taktıkasy men tehnıkasyn ótkize bilýi qajet», – dedi Vasılıı Jırov.
Qazir ol Dýbaıda jumys istep júr. Sportshy aldaǵy ýaqytta Qazaqstan boksynyń damýyna úles qosýǵa ázir ekenin jetkizdi.
Aıta keteıik, Vasılıı Jırov – 1996 jylǵy Atlanta Olımpıadasynyń chempıony, Vela Barkera kýbogynyń ıegeri; áýesqoıda álem jáne Azııa chempıonattarynyń, Azııa oıyndarynyń júldegeri; kásipqoıda IBF nusqasy boıynsha álem chempıony ataǵyn ıelenip, belbeýdi shamamen tórt jyl qorǵaǵan.
Eske salaıyq, 2017 jyly Qazaqstan boksynyń jaryq juldyzy Vasılıı Jırov ıslam dinin qabyldady degen aqparat taraǵan bolatyn.
