Dýbaıda Taıaý Shyǵys jáne Soltústik Afrıkanyń eń bedeldi áıelderi bas qosty
ÁBÝ-DABI. QazAqparat - Bul kúnderi Madinat Jumeirah (Dýbaı) qonaqúıinde Taıaý Shyǵys jáne Soltústik Afrıkanyń kóptegen elderiniń bedeldi názik jandylaryn jınaǵan Áıelderdiń jahandyq forýmy ótip jatyr.
Forým «Jańalyq engizeıik!» uranymen ótýde. Atalǵan shara Ámirlikter úkimetiniń BAÁ-degi áıelderdiń, sondaı-aq búkil arab álemindegi áıelderdiń dárejesin kóterý nıetin kórsetip otyr.
Sharaǵa Chılı prezıdenti Mıshel Bachelet, Mavrıkıı Respýblıkasynyń prezıdenti Ámına Garıb Fakım, Halyqaralyq valıýta qorynyń úılestirýshi-dırektory Krıstın Lagard, Iordanııa Koroliniń zaıyby Ranııa Ál Abdalla jáne taǵy birqatar saıası kóshbasshy áıelder keldi. Sondaı-aq forýmǵa 2 myńnan astam halyqaralyq jáne aımaqtyq ókilder, 200 spıker, sonyń ishinde BAÁ-niń eń bedeldi áıelderi qatysyp otyr.
Dýbaı forýmdy ótkizý qalasy retinde kezdeısoq tańdalǵan joq. 2014 jyldyń Áleýmettik damý ındeksiniń (Social Progress Index 2014) málimetterinshe, BAÁ áıelderge qurmetpen qaraý reıtınginde (Women Treated with Respect) 132 eldiń arasynda 1-shi oryn aldy. Sondaı-aq Ámirlikter 2013 jyldyń genderlik damý týraly baıandamasynyń (Global Gender Gap Report 2013) málimetterine sáıkes, arab aımaǵynda birinshi orynda tur.
