Dýbaıda sýda qalqyp júretin sýpermarket ashyldy
ASTANA. QazAqparat - Dýbaıdaǵy Parsy shyǵanaǵynyń jaǵalaýynda «Carrefour» halyqaralyq jelisiniń sýda qalqyp júretin álemdegi alǵashqy sýpermarketi jumys isteı bastady, dep habarlaıdy Arabian Business.
Shaǵyn saýda núktesi birinshi kezekte qaıyqtar men sý mototsıklderinde júzip júrgen adamdarǵa arnalǵan. Ol úsh jaǵajaıdyń qol jeterlik aımaǵynda ornalasqan.
Munda satyp alýshylarǵa shamamen 300 taýardyń ataýy usynylyp otyr. Onda túrli sýsyndar, jeńil tamaq, balmuzdaq, jeke gıgıena zattaryn jáne keıbir medıtsınalyq preparattardy satyp alýǵa bolady.
Arnaıy terezege júzip kelgen klıent, qajetti azyq-túlikter tizimine tapsyrys berip, odan keıin qajetti taýaryn alyp kete alady. Eger qaıyq dúkenge jaqyndaı almasa, onyń jolaýshylary tıisti zattarǵa telefon arqyly tapsyrys bergen soń, taýar 45 mınýttyń ishinde bortqa jetkiziledi.
