Dýbaıda sheıh Ahmed ben Rashıdtiń qazasyna baılanysty on kún aza tutylady
ASTANA. KAZINFORM — BAÁ memlekettik qurylymdar men sport salasynyń damýyna úles qosqan Ál Maktým áýletiniń ókili sheıh Ahmed ben Rashıdpen qoshtasty. Bul týraly Kazinform agenttiginiń Taıaý Shyǵystaǵy menshikti tilshisi habarlaıdy.
Dýbaıda dúısenbi kúni 76 jasynda qaıtys bolǵan sheıh Ahmed ben Rashıd Ál Maktýmnyń qazasyna baılanysty 21-30 qyrkúıek aralyǵynda on kúndik resmı aza tutý jarııalandy.
Tıisti sheshimdi Dýbaı ámiriniń keńsesi qabyldady. Bul týraly WAM ámirlik aqparat agenttigi habarlady.
Osy kezeńde ámirliktegi memlekettik tý tómen túsiriledi. Aza tutý jarııalanýy demalys kúnderin bildirmeıdi. Sondyqtan bılik ózgeshe sheshim qabyldamasa, jekemenshik kompanııalar men bilim berý uıymdary óz jumysyn jalǵastyra beredi.
Mundaı kezde memlekettik telearnalar men radıostantsııalar habar taratý kestesin ózgertedi. Al oıyn-saýyqqa arnalǵan is-sharalar toqtatylyp, keıinge qaldyrylýy múmkin.
Seısenbide Dýbaı ámiri, BAÁ vıtse-prezıdenti ári premer-mınıstri sheıh Muhammed ben Rashıd Ál Maktým Zabıl Úlken meshitinde aǵasyna arnap janaza namazyna qatysty.
Janazaǵa Dýbaıdyń taq murageri sheıh Hamdan ben Muhammed, bıleýshi áýletterdiń ózge de ókilderi, mınıstrler men joǵary laýazymdy tulǵalar qatysty.
Ahmed ben Rashıd Dýbaı ámiriniń inisi ári 1958-1990 jyldary ámirlikti basqarǵan, sondaı-aq BAÁ-niń negizin qalaýshylardyń biri bolǵan sheıh Rashıd ben Saıd ál-Maktýmnyń tórt ulynyń kenjesi edi. Ol Sandherst koroldik áskerı akademııasyn bitirip, Dýbaı polıtsııasy men qoǵamdyq qaýipsizdik basqarmasy tóraǵasynyń orynbasary qyzmetin atqarǵan.
Sheıh Ahmed kóp jyl «Al-Vasl» fýtbol klýbyn basqardy. Sondaı-aq at sporty men sý sportynyń damýyna úles qosty. Onyń esimi Djebel-Alı ıppodromynyń qalyptasýymen jáne Dýbaı halyqaralyq teńiz sport klýbynyń qurylýymen baılanysty.
BAÁ prezıdenti sheıh Muhammed ben Zaıd ál-Nahaıan bastaǵan el basshylyǵy men ámirlikter bıleýshileri marqumnyń týǵan-týystaryna kóńil aıtty.
— Sen kózden ketseń de, kóńilden ketpeısiń. Duǵamyzda da, júregimizde de máńgi qalasyń, — dep aǵasymen qoshtasty sheıh Muhammed ben Rashıd.
Buǵan deıin Memleket basshysynyń sheıh Muhammed ben Rashıd Ál Maktýmǵa kóńil aıtqany habarlanǵan bolatyn.
Aqzat Jıenalına
