Dýbaıda reseılik týrısterdiń kelýiniń azaıýy saldarynan qysqy tondarǵa suranys kemigen
ÁBÝ-DABI. QazAqparat - Birikken Arab Ámirlikteriniń valıýta birligi - dırhammen tyǵyz baılanysty rýbldiń dollarǵa qatysty baǵamynyń ózgerýi Dýbaı ekonomıkasynyń týrısterdiń sany men satyp alýshylyq qabiletine táýeldi segmentteriniń quldyraýyna ákep soqty.
Amerıkalyq Chicago Tribune basylymy Reseıdegi ekonomıkalyq qıyndyqtardyń BAÁ-niń ekonomıkasyna áser etýine taldaý jasaǵan maqalany jarııalap, onda Reseı BAÁ-niń naryǵyn týrıster sanynyń basym bóligimen qamtamasyz etip otyrǵanyn atap ótedi.
Qysqy tondardy satatyn ondaǵan dúkender bárinen de kóp shyǵynǵa batty, olar óz taýarlaryna suranystyń ótken jylmen salystyrǵanda 70 paıyzǵa tómendegenin aıtýda. Sonymen qatar jalpy saýda kólemi, týrıstik sektor, turǵyn úıler men qonaqúıler zardap shegýde. Aǵymdaǵy jyly reseılikterdiń Dýbaı dúkenderinen taýarlardy satyp alýy 10 paıyzǵa tómendegen, al ótken jyly munda bank kartochkalarymen ǵana 3,3 mlrd. dırham (904 mıllıon dollar) kóleminde qarajat jumsaǵan olar kósh bastaǵan edi. Dýbaı dúkenderiniń saýda aınalymynyń 35 paıyzy týrısterdiń úlesinde, demek reseılikterdiń kelýi sany men satyp alýshylyq qabiletiniń azaıýy saýda sektoryna mindetti túrde áser etedi. Sondaı-aq reseılik «Ýral áýe jelileri» áýe kompanııasy suranystyń tómendeýine baılanysty 2015 jyldyń 18 qańtarynan bastap Birikken Arab Ámirlikterine Perm, Chelıabi jáne Nıjnıı Novgorod qalalarynan ushatyn reısterdi toqtatpaq. «Dýbaıǵa Mıneraldy sýlardan ushatyn reıster 16 jeltoqsannan bastap toqtatylǵan. Mundaı reısterdiń jolaýshylaryna erterek ushyp shyǵý kúnderi usynylyp, nemese áýe bıletterin qaıtaryp berý rásimdelýde», - dep atap ótti baspasóz qyzmetinen. Baspasóz qyzmetindegiler Dýbaıǵa ushýǵa suranystyń tómendeýin tek áýe kompanııasynyń mamandary ǵana emes, atalǵan baǵytta jumys jasaıtyn týroperatorlardyń da ańǵaryp otyrǵanyn atap ótti.
