Dýbaıda «Pavlodar» arnaıy ekonomıkalyq aımaǵy tanystyryldy
ASTANA. QazAqparat - Dýbaıda «Pavlodar» arnaıy ekonomıkalyq aımaǵyn tanystyrý sharasy tabysty ótti, dep habarlaıdy QazAqparat tilshisi.
«World free zone Organization» - bul 2014 jyly qurylyp, búkil álemdegi erkin jáne aıryqsha ekonomıkalyq aımaqtardy, erkin aımaq qaýymdastyqtary men erkin jáne aıryqsha ekonomıkalyq aımaq qaýymdastyqtaryn biriktiretin kommertsııalyq emes uıym. Bizdiń arnaıy ekonomıkalyq aımaǵymyz atalǵan uıymnyń tolyq quqyly múshesi mártebesin alyp otyr. Bul Pavlodar oblysynyń ınvestıtsııalyq áleýetiniń kókjıegin halyqaralyq arenada keńeıtýge múmkindik beredi», - dep málim etti jýrnalısterge «Pavlodar» arnaıy ekonomıkalyq aımaǵy basqarmasynyń tóraǵasy Aıbek Tursynǵalıev.
Pavlodar oblysy ákimdiginiń atap ótýinshe, Birikken Arab Ámirlikteriniń vıtse-prezıdenti jáne Premer-Mınıstri Mýhammed ben Rashıd al Maktýmnyń qamqorlyǵymen Dýbaıda ótken halyqaralyq forýmǵa álemniń 50 elinen 1 myńnan astam adam qatysqan. Osy shara barysynda «Pavlodar» arnaıy ekonomıkalyq aımaǵy tanystyrylǵan.
Atalǵan alańda sóz sóılegen «Pavlodar» arnaıy ekonomıkalyq aımaǵy basqarmasynyń tóraǵasy Aıbek Tursynǵalıev arnaıy ekonomıkalyq aımaqtyń múmkinshiligi men keleshegi jaıynda keńinen aıtyp bergen. Osydan keıin áleýetti ınvestorlarmen arada birqatar kelissóz júrgizilgen.
«Pavlodar» arnaıy ekonomıkalyq aımaǵynyń múmkinshiligine bedeldi ekonomıkalyq basylym «fDi magazine» ókilderi de joǵary baǵalaryn berdi. Atalǵan basylymnyń bas redaktory Kortnı Fıngar Pavlodar oblysynda atqarylǵan jumystarǵa joǵary baǵasyn berip, Ertis jaǵalaýyndaǵy arnaıy ekonomıkalyq aımaqqa kelýge qyzyǵýshylyq tanytty», - dep atap ótedi óńir ákimdiginen.
