Dýbaıda ótetin AI Film Award 2027 baıqaýynyń jeńimpazyna 1 mln dollar beriledi
ASTANA. KAZINFORM — Jasandy ıntellekt kómegimen túsirilgen qysqametrajdy fılmderge arnalǵan halyqaralyq AI Film Award 2027 baıqaýy ótinim qabyldaýdy bastady. Baıqaýda úzdik dep tanylǵan týyndynyń avtoryna 1 mıllıon AQSh dollary tabystalady, dep habarlaıdy Kazinform agenttigi WAM-ǵa silteme jasap.
Baıqaýǵa álemniń ár túkpirinen 18 jastan asqan avtorlar qatysa alady. Úmitkerler jasandy ıntellekt arqyly túsirilgen, uzaqtyǵy 5-7 mınýt aralyǵyndaǵy qysqametrajdy fılmderin usynýǵa tıis.
Fılmderdi kez kelgen tilde túsirýge bolady, biraq aǵylshyn tilindegi sýbtıtrler mindetti.
Qatysýshylar bes taqyryptyń birin tańdaı alady: qoǵam jáne gýmanıtarlyq máseleler, jalǵan aqparat, adam men jasandy ıntellekt baılanysy, klımat jáne tabıǵat.
Qazylar alqasy fılmniń mazmuny men ıdeıasynyń biregeıligine, kórkemdik stıli men tehnıkalyq sapasyna, sondaı-aq jasandy ıntellektiniń qanshalyqty tıimdi qoldanylǵanyna mán beredi.
Ótinimder 2026 jylǵy 20 qarashaǵa deıin qabyldanady. Úzdik on fılmniń tizimi 15 jeltoqsanda jarııalanyp, sol kúni ashyq daýys berý bastalady. Al bes fınalıstiń esimi 25 jeltoqsanda belgili bolady.
Baıqaý jeńimpazy 2027 jylǵy 10 qańtarda Dýbaıda ótetin 1 Billion Followers sammıtinde anyqtalady. Sammıt 8-10 qańtar aralyǵynda uıymdastyrylady. Baıqaý talaptaryna sáıkes, avtorlar óz týyndylaryna qatysty avtorlyq quqyqtaryn saqtaıdy.
Eske sala keteıik, qazan aıynyń basynda Astanada ótken Astana AI Film Festival festıvaline 125 elden 8 067 ótinim tústi. Fınaldyq kezeńge 25 jumys irikteldi. Festıvaldiń jalpy júlde qory 2 mıllıon AQSh dollary boldy. Onyń ishinde Latvııa ókili Nıkolaı Shestak «The First Honest Day» fılmi úshin 450 myń dollar ıelendi. Al qazaqstandyq Myrzahan Jumahan «Úzdik keıipker» nomınatsııasynda jeńimpaz atandy.
Aqzat Jıenalına
