Dýbaıda ómir boıyna sottalǵan qazaqstandyqqa qandaı aıyp taǵylyp otyr
ASTANA. KAZINFORM – Syrtqy ister mınıstrliginiń resmı ókili Erlan Jetibaev Birikken Arab Ámirlikterinde ómir boıyna bas bostandyǵynan aıyrylǵan qazaqstandyq Ernur Almahan isi boıynsha mán-jaıdy aıtyp berdi.
Ámirlik tarapynyń málimetinshe, atalǵan azamat 2025 jyly Birikken Arab ámirliginiń quzyrly organdary qozǵaǵan qylmystyq is boıynsha aıyptalýshylardyń biri bolyp otyr.
Bıyl 18 naýryzda Dýbaı qalasynyń birinshi satydaǵy soty Qazaqstan azamatyn qylmystyq quqyqbuzýshylyq jasaǵany úshin kináli dep tanydy. Oǵan ómir boıyna bas bostandyǵynan aıyrý jáne aıyppul jazasyn taǵaıyndady.
– Atalǵan qylmystyq is adam urlaý jáne zańsyz bas bostandyǵynan aıyrý, densaýlyqqa aýyr zııan keltirý, adamnyń ar-namysy men qadir-qasıetine qol suǵý sekildi aýyr qylmystar sanatyna jatady. Qazirgi ýaqytta atalǵan is boıynsha apellıatsııalyq shaǵym berilgen. Osyǵan baılanysty úkim zańdy kúshine engen joq, – dedi E. Jetibaev elordada ótken brıfıngte.
Resmı ókildiń aıtýynsha, QR Syrtqy ister mınıstrligi men elshilik bul jaǵdaıdy erekshe baqylaýda ustap otyr.
Eske sala ketsek, BAÁ-de ómir boıyna sottalǵan qazaqstandyqty elge qaıtarý múmkindigi qarastyrylyp jatyr.
