Dýbaıda múlki tirkelgenderdiń bárin birdeı qaralaǵan durys emes – Senat tóraǵasy

ASTANA. KAZINFORM – Dýbaıda múlki barlardyń bárin birdeı qaralaý durys emes. Sebebi olardyń arasynda zańdy jolmen tabysty bolǵan adamdar bar. Bul týraly Senat tóraǵasy Máýlen Áshimbaev málim etti.

Búgin Senattyń jalpy otyrysynan keıin tilshiler «Dýbaıdaǵy Qazaqstan azamattarynyń úılerin quzyrly organdar tekserýi kerek pe?» degen suraq qoıdy.

«Meniń bilýimshe, osy suraqty sizder keshe Bas prokýratýradaǵy zańsyz aktıvterdi qaıtarý úshin qurylǵan komıtettiń tóraǵasyna qoıdyńyzdar. Komıtettiń tóraǵasy bul suraqqa jan-jaqty jaýap berdi dep esepteımin. Komıtet tóraǵasynyń aıtýynsha, bul máseleniń bári jumys babynda qaralady. Eger de sol aktıvter zańsyz túrde alynǵan bolsa, olar tizimge kirgiziledi nemese olardyń qalaı alynǵany týraly naqty jumystar júrgiziledi. Ári qaraı zańnyń aıasynda tıisti sheshimder qabyldanady», - dedi Senat tóraǵasy.

Bul turǵyda ol barlyq qadam zań aıasynda iske asyrylatynyn aıtty.

«Sonymen qatar 1500-deı qazaqstandyqtyń Dýbaıda ártúrli úıleri, basqa da múlikteri bar degen aqparat bar. Endi olardyń barlyǵyn qaralaý artyqtaý bolatyn shyǵar. Onyń ishinde kásipkerler de bar, ıaǵnı kásibimen aınalysyp, zańdy túrde tabysyn taýyp, sol múlikterdi alǵan. Sondyqtan bul jerde jurttyń bári zań buzypty dep aıtqanymyz artyqtaý bolar. Sol sebepti bul máselelerdi Bas prokýratýra qaramaǵyndaǵy tıisti komıtet zań aıasynda qaraıtyny týraly keshe ózderińizge aqparat berildi. Ári qaraı osy máselege qatysty keıbir túsiniktemelerdi Bas prokýratýraǵa joldaǵandaryńyz durys bolady», - dedi Máýlen Áshimbaev.