Dýbaıda metronyń «Altyn jelisi» ashylady

ASTANA. KAZINFORM – Dýbaı metronyń «Altyn jelisi» jańa jobasyn iske qosý arqyly óz tarıhynda qoǵamdyq kólik júıesin keńeıtýge daıyndalyp jatyr.

Qurylys jobasyn Dýbaı bıleýshisi sheıh Muhammed bın Rashıd Ál Maktým jarııalady. Jańa 42 shaqyrymdyq «Altyn jeli» 18 stantsııany jáne qazirgi zamanǵy týnnelder jelisin qamtıdy. Bul Dýbaı metrosynyń qoldanystaǵy týnnelderinen eki ese kóp.

Ol qalanyń 15 negizgi strategııalyq aımaǵy arqyly ótetin bolady. Shamamen 1,5 mln turǵynǵa qyzmet kórsetedi jáne salynyp jatqan 55 iri jyljymaıtyn múlik nysanymen kólik baılanysyn jaqsartady.

- Dýbaıdy álemde ómir súrýge eń qolaıly qalaǵa aınaldyrýǵa baǵyttalǵan mańyzdy jobalarymyz jolǵa qoıylǵan. Bolashaqtaǵy is-sharalarymyz toqtap qalmaıdy, kerisinshe, jedeldeıdi. Bizdiń josparymyz – mıllıondaǵan adam úshin jaqsy bolashaq qurý. Biz ýádemizdi oryndap kelemiz, - dep jazdy Dýbaı bıleýshisi H áleýmettik jelisinde.

Jobany iske asyrý quny 34 mlrd dırhamǵa (9,25 mlrd dollar) baǵalanyp otyr. Qurylystyń aıaqtalýy 2032 jyldyń 9 qyrkúıegine josparlanǵan. Bul Dýbaı metropolıteni ashylýynyń 23 jyldyǵymen tuspa-tus keledi.

2040 jylǵa qaraı kúndelikti jolaýshylar sany 465 myńǵa jetedi dep josparlanyp otyr. 20 jyldaǵy jıyntyq ekonomıkalyq kiris – 430 paıyzǵa deıin.

Osyǵan deıin Dýbaıda altynnan kóshe salynatynyn jazdyq.