Dýbaıda Qazaqstannyń ınvestıtsııalyq múmkindikteri tanystyrylýda
Annual Investment Meeting (AIM) - halyqaralyq ınvestıtsııalyq qoǵamdastyqtyń dıalog alańy retindegi jyl saıynǵy iri ınvestıtsııalyq konferentsııa bolyp tabylady. Investıtsııalyq konferentsııanyń baǵdarlamasy ındýstrııa 4.0, memlekettik-jekeshelik áriptestik jáne ınvestıtsııalardy tartý boıynsha álem strategııalarynyń taqyryptarynda birqatar plenarlyq sessııalardy qamtıdy.
«Qazaqstan men BAÁń qatynastarynyń tarıhy úlken. Biz osy bıylǵy is-sharada qazaqstandyq delegatsııany qarsy alǵanymyzǵa qýanyshtymyz. AІM kórmesiniń basshylyǵy Qazaqstannyń delegatsııasyna kezdesýdi sátti ótkizý úshin qoldaý kórsetýge daıyn. Bul Qazaqstanǵa transulttyq kompanııalardy tartýǵa arnalǵan úlken platforma. Biz sizderdiń osy is-sharadan barynsha joǵary nátıjelerge qol jetkizgenderińizdi qalaımyz», - dedi «Annual Investment Meeting» prezıdenti Daýd Al Shezavı.
Qazaqstandyq delegatsııa quramynda 15-ten asa iri otandyq kompanııalardyń basshylary, memlekettik organdar men ulttyq kompanııalardyń ókilderi bar.
Budan basqa, forýmnyń alańdarynda 141 shet memleketterdiń qatysýymen eldik pavılondardyń kórmesi ótip jatyr.
«Biz Dýbaıdaǵy Dúnıejúzilik saýda ortalyǵynda Qazaqstan pavılonyna bardyq, óıtkeni estýimiz boıynsha Qazaqstanda bıznes pen naryq óte damyǵan jáne biz sizderdiń elderińizde bıznesimizdiń bolǵanyn qalaımyz. Qazirgi ýaqytta biz búkil álem boıynsha bıznes seriktesterdi izdeýdemiz, ásirese Taıaý Shyǵysta, Italııada, Qazaqstanda, Reseıde. Biz Dýbaıda damyp kele jatyrmyz jáne bizge jańa seriktestermen bıznesti ashý kerek», - deıdi qazaqstandyq pavılonǵa kelgen «AT WORLD Holding» kompanııasynyń ókili Mahmýd Shalash.
«Kazakh Invest» uıymdastyrǵan Qazaqstan pavılonynyń jumysy Dýbaıda ekinshi kún jalǵasýda. Odan basqa, búgin Qazaqstannyń AІM sessııasynyń aıasynda ınvestıtsııalyq múmkindikteriniń prezentatsııasy, sonymen qatar «Kazakh Invest» basshylyǵynyń eń iri arab kompanııaladyń ókilderimen birqatar ekijaqty kezdesýlerdi ótkizý josparlanǵan.
