Dýbaıda Qasıetti Quran saıabaǵy salynady
ASTANA. 23 maýsym. QazAqparat - Dýbaıda Qasıetti Quran saıabaǵy salynbaq. Quny 27 mıllıon dırhem bolatyn joba kelesi jyldyń qyrkúıek aıyna qaraı aıaqtalady dep josparlanyp otyr.
Bul týraly Astanadaǵy Áziret Sultan meshitiniń resmı saıtynda habarlandy.
Saıabaq Quran Kárimde aty atalǵan aǵash pen ósimdikterden turady. Ál Haýanıj qalasynda salynatyn Qasıetti Quran saıabaǵynyń qurylysy jaıynda josparmen Dýbaı qalasynyń jobalar departamenti habarlaǵan. Quran Kárimde atalatyn barlyq ósimdikter 60 gektar jerge otyrǵyzylatyn bolady. Atap aıtsaq, anar, záıtún maıy, júgeri, sarymsaq, injir, jasymyq, arpa, bıdaı, janjábil, qarbyz, júzim, banan, qııar, asqabaq, tamarınd, raıhan, t.b. ósimdikter.«Qasıetti Quranda ósimdiktiń 54 túri atalǵan. Sonyń 35 túri bizdiń saıabaqta ósetin bolady», - deıdi departament dırektory Muhammed Nur Mashrým. As dámdeýishterdiń 15 túri jylyjaıda ósedi, al 20-sy ashyq aspan astynda.
Sondaı-aq, saıabaqta Quranda aıtylǵan muǵjızalardy aýdıo jáne beıne materıaldar arqyly kórsetetin arnaıy bólme de bolady. Muhammedtiń aıtýynsha, saıabaq halyqty Qurannan habardar etý maqsatynda salynbaq.
