Dýbaıda dron qaldyqtary kólikke qulap, bir adam qaza tapty
ASTANA. KAZINFORM — BAÁ úkimeti Dýbaıdyń Al-Barsha aýdanynda kólikke ushqyshsyz ushý apparatynyń (dronnyń) qaldyqtary qulap, júrgizýshiniń qaza tapqanyn habarlady. Bul týraly TASS málimdedi.
Dýbaı bıliginiń málimetinshe, qaldyqtar áýe nysanasyn sátti túrde qaǵyp túsirý kezinde paıda bolǵan. Keıin onyń bólikteri kóliktiń ústine qulap, saldarynan júrgizýshi oqıǵa ornynda kóz jumǵan.
Buǵan deıin áleýmettik jelilerde Dýbaıdaǵy záýlim ǵımarattardyń birine jasalǵan bolýy múmkin soqqy týraly beıne taraǵan. Kýágerler túsirgen kadrlarda BAÁ-niń iri qalasyndaǵy bıik ǵımarattardyń birinen órt shyǵyp, tútin kóterilgeni kórinedi.
Irannyń memlekettik telearnasy bul ǵımaratta Izraıl men AQSh qarýly kúshterine tıesili nysan bolǵanyn málimdedi.
Sonymen qatar, buǵan deıin Iranda 6668 azamattyq nysan AQSh pen Izraıldiń shabýylyna ushyraǵany habarlanǵan.
Eske salaıyq, Irannyń ushqyshsyz ushý apparattary Ázerbaıjannyń Nahıchevan qalasyndaǵy áýejaıǵa shabýyl jasaǵannan keıin Qazaqstan Prezıdenti Qasym-Jomart Toqaev óz ustanymyn bildirgen bolatyn. Memleket basshysy Iranmen birlesip oqıǵany muqııat tergeýge úmit artatynyn jáne óńirdegi shıelenisti ýshyqtyrmaý úshin máseleni dıplomatııalyq jolmen retteý qajet ekenin atap ótti.
Sondaı-aq, Qasym-Jomart Toqaev Irannyń kórshi elderge shabýyl jasamaý týraly sheshimin quptaıtynyn da aıtty.
