Dýbaıda avtojoly bar alyp saýda ortalyǵy salynady
ASTANA. KAZINFORM – Dýbaıda elektromobılder júrýge arnalǵan joldary bar alyp Dubai Square Mall kesheni salynyp jatyr. Joba aıaqtalǵan kezde ol óńirdegi eń iri saýda ortalyǵy bolady, dep habarlaıdy Gulf News.
Gulf News aqparatyna sáıkes, keshenniń jalpy aýmaǵy 2,6 mln sharshy metrdi quraıdy, bul kólemimen Downtown Dubai aýdanynan úsh ese úlken. Dubai Square Mall kádimgi saýda ortalyǵynan bólek, «shańyraq astyndaǵy qala» bolyp jobalanǵan. Onyń ishki joldarymen kelýshiler elektromobıldermen júre alady.
Merdiger Emaar Properties kompanııasynyń málimetinshe, jobanyń jalpy quny 180 mlrd BAÁ dırhamyn quraıdy. Saýda ortalyǵy Dubai Creek Harbour aýmaǵyndaǵy turǵyn jáne kommertsııalyq ınfraqurylymdy biriktiretin aýqymdy jobanyń bir bóligi bolady.
Qurylysta jasandy ıntellekt negizindegi zamanaýı tsıfrlyq júıeler men jobalaý quraldary qoldanylady. Olar kelýshilerdiń bolashaq qajettilikterin aldyn ala boljaýǵa múmkindik beredi.
Eske salaıyq, buǵan deıin Dýbaıda fýtýrıstik meıramhananyń shef-povary jasandy ıntellekt bolatyny habarlanǵan edi.
Sondaı-aq 2026 jyly qalada alǵashqy aerotaksı iske qosylmaq.