Dýbaıda áýe taksıi 2026 jyly iske qosylady
ASTANA. KAZINFORM – Dýbaıda alǵashqy kommertsııalyq aerotaksıdi iske qosý 2026 jylǵa josparlanyp otyr. Qazirgi ýaqytta áýe kóliginiń ushyp-qonýyna arnalǵan vertıporttar salynýda, dep habarlaıdy NBC.
AQSh-tyń Joby Aviation Inc. kompanııasy Uber servısimen birlesip 2026 jyly Dýbaıda alǵashqy áýe taksıdi paıdalanýǵa berýdi josparlap otyr. Kompanııa 16 jyl boıy elektrli áýe apparatyn ázirledi. Ol kólemi jol talǵamaıtyn kólikpen shamalas, alty vınti bar, tórt jolaýshyǵa arnalǵan jáne saǵatyna 320 km jyldamdyqqa deıin ushady.
NBC dereginshe, aerotaksıdegi sapar quny Uber Black qyzmetiniń eń qymbat tarıfine teń bolady. Áýe taksıi kádimgi taksıdi tapsyrystan aıyrmaıdy. Alaıda áýe kóligi tek arnaıy alańdar – vertıporttardan ǵana ushyp-qona alady. Sol alańdarǵa deıingi joldy jolaýshylarǵa ádettegi Uber kóligi qamtamasyz etedi.
Amerıkalyq telearna taratqan málimetke sáıkes, Dýbaıda qazirdiń ózinde tórt vertıporttyń qurylysy júrip jatyr. Onyń biri Ál-Maktým halyqaralyq áýejaıynda ornalasady. Aerotaksı áýejaıdan Dýbaı ortalyǵyna 45 mınýttyq joldy nebári 10 mınýtta eńseredi.
Buǵan deıin Almaty men Alataý qalalarynda áýe taksıi iske qosylatyny jarııalanǵan edi.