Dýbaıda ańyzdar jelisimen Alladın qalasy turǵyzylmaq
ASTANA. QazAqparat - Dýbaı bıligi ámirliktiń tarıhı bóliginde Alladınniń jabyq qalasyn salý boıynsha iri jobany júzege asyrýdy qolǵa aldy. Ol qala eski porttyń ústinen sýda salynbaqshy, dedi ámirliktiń «Ál-Halıdj» gazetine silteme jasaǵan QazAqparat tilshisi.
Alladın qalasynyń jobasy shyǵystyń dástúrine sáıkes, altyndatylǵan qurylǵylardan, torly kómkermelerden jasalǵan. Onda shyǵystyń maıly shamyn, ásem qumyrany, hosh ıisti átirdiń saýytyn eske salatyn negizgi úsh munara bolmaq. Olardyń eń uzyny 450 metrge deıin kóteriledi. Alladın qalasynda turǵyn úı kesheni, qonaqúı, bıznes ortalyqtary, saýyq saıabaǵy men dúkender, meıramhanalar men dámhanalar oryn tebedi. Avtorlarynyń aıtýynsha, jobany jasaǵanda Dýbaıdyń erekshe qorǵalatyn tarıhı aýdany «Hor-Dýbaıdyń» tabıǵatyna qııanat jasamaý jaǵy erekshe eskerildi. Sol maqsatta joba sýdyń ústinde júzege asyrylady. Ámirlik qalasynyń bıligi «ejelgi ańyzdar» negizinde turǵyzylatyn qala bıznesmender men týrısterdiń kóńilinen shyǵady degen oıda.
