Dýbaıda álemdegi eń alǵashqy eko-meshit ashylady
ASTANA. QazAqparat - Dýbaıda ekologııalyq turǵydan álemdegi eń taza meshittiń qurylysy aıaqtalýǵa jaqyn, dep habarlaıdy Gulf News.
Qazir jobanyń 85 paıyzy júzege asyrylǵan. Bul meshit basqa ımandylyq úılerinen aıryqsha dızaınymen erekshelenedi, sonyń arqasynda elektr energııasy edáýir únemdeledi. Ǵımaratta qajetti bólme temperatýrasy saqtap turý úshin zamanaýı tehnologııalar qoldanylady. Ózdiginen qaraıatyn terezeler kún sáýlesiniń túsýin shektese, biregeı materıaldar ǵımarat ishin salqyndatyp turady. Sondaı-aq meshit aýmaǵynda kún batareıasyn ornatý kózdelip otyr. Al, paıdalanylǵan sýlar, tipti, jaýyn-shashyn da arnaıy tazartýdan ótkizilmek. Sóıtip, qandaı da bir ýaqyt ótken soń qaıta óńdelgen ylǵal sýarý jáne tutyný úshin paıdalanylmaq. Taıeb ál-Raıs jobasynyń avtorlarynyń biri habarlaǵandaı, bul eko-ǵımarat Dýbaıdaǵy alyp ǵımarat bolmaq, ol 10 myń sharshy metr aýmaqty alyp jatyr, al onyń ishki kólemi 4,2 myń sharshy metrdi quraıdy. Aldyn ala esepteýler boıynsha, meshitte bir mezette 3500 adam qulshylyq ete alady. Dýbaı bıligi jańa meshit halyqaralyq dárejede moıyndalyp, BAÁ basty sımvoldarynyń birine aınalady dep úmittenedi.
