Dýbaıda álemdegi asa bıik qonaqúı ashyldy
ASTANA. Jeltoqsannyń 22-i. QazAqparat - Birikken Arab Ámirlikterindegi iri qala Dýbaıda álemdegi asa bıik qonaqúı ashyldy. «Roza» (Rose) dep atalatyn dýbaılyq apart-oteldiń bıiktigi 333 metrdi quraıdy,
dep habarlaıdy QazAqparat RIA «Novostı» agenttigine silteme jasap.
71 qabatty qonaqúıde 70 - bir bólmeli jáne 48 eki bólmeli apartamentter bar. Qurylysy 5 jylǵa sozylǵan ǵımarat qurylys salýshylarǵa 136 mıllıon dollarǵa tústi.
Apart-otel buǵan deıin álemdegi qonaqúı jyljymaıtyn múlki salasyndaǵy eń bıik nysan bolyp kelgen 60 qabatty «Arab munarasy» dýbaılyq qonaqúıinen 12 metr bıik.
Eki jyldan keıin «Arab munarasyn» ekinshi orynnan Phenıandaǵy qurylysy 22 jyl buryn bastalǵan «Rıýgen» qonaqúıi jyljytýy múmkin. Qonaqúıi «májnún tal ordasy» degen maǵynany bildiretin Phenıannyń burynǵy ataýynyń qurmetine oraı atalǵan. Bastapqyda Soltústik Koreıa úkimeti bıiktigi 330 metrlik kókpen talasqan ǵımaratty 1989 jyly salýdy josparlaǵan. Biraq jobanyń qarjylandyrylýy 1993 jyly toqtatyldy. Endi «Rıýgenniń» qurlysy 2012 jyly aıaqtalmaqshy.
