Dýbaıda álemdegi eń bıik metro stantsııasy salynady
ASTANA. KAZINFORM — Dýbaıda metro jelisin keńeıtý jobasy aıasynda álemdegi eń bıik metro stantsııasy salynbaq. Bul týraly AZERTADJ habarlady.
Dubai Creek Harbour atty qarqyndy damyp kele jatqan aýdanda ornalasatyn bul stantsııa Emaar Properties Station dep atalady jáne onyń bıiktigi 74 metrge jetedi.
AZERTADJ-tyń sheteldik aqparat kózderine silteme jasap habarlaýynsha, stantsııany Skidmore, Owings & Merrill atty amerıkalyq sáýlet bıýrosy jobalaǵan. Bul kompanııa buǵan deıin álemdegi eń bıik ǵımarat – Býrdj-Halıfanyń da jobasyn jasaǵan. Jańa stantsııanyń sáýlettik sheshimi «qıylysqan qaqpalar» tujyrymdamasyna negizdelgen. Onyń jalpy aýdany 11 myń sharshy metr jáne kúnine 160 myń jolaýshyny qabyldaı alady.
Kók jeli qalanyń kólik qatynasyn jaqsartýǵa baǵyttalǵan. Ol metronyń Qyzyl jáne Jasyl jelilerimen úsh aýysymdyq stantsııa arqyly biriktiriledi. 2029 jyly paıdalanýǵa beriletin bul jańa jeli Akademııalyq qala, Al-Varka, Dýbaı Kremnıı oazısi, Halyqaralyq qala jáne Mırdıf sııaqty mańyzdy turǵyn jáne iskerlik aımaqtarǵa qatynasty jeńildetedi.
Aıta ketelik Dýbaıdaǵy Mall of Emirates saýda ortalyǵyn keńeıtýge 1,36 mlrd dollar jumsalatyny týraly jazǵan edik.