Dýbaıda 134 qazaqstandyq jolaýshyny ornalastyrý máselesi sheshilmeı tur

ASTANA. KAZINFORM – «Týrıstik Qamqor» korporatıvtik qorynyń tóraǵasy Inna Reı Kazinform agenttiginiń tilshisimen tildesý barysynda Taıaý Shyǵystaǵy kúrdeli jaǵdaıǵa baılanysty qazaqstandyq týrısterdi Birikken Arab Ámirlikterinen elge qaıtarý máselesin kóterdi.

— Qazir týrısterdiń bir bóligi Dýbaıda. San ózgerip jatyr, sońǵy málimetter boıynsha 134 jolaýshyny ornalastyrý qajet. Biz aqparatty oqıǵa bolǵannan keıin ǵana alamyz. Sebebi Fly Dubai men Air Arabia áýe kompanııalarynyń ushý kesteleri aýytqyp, bir táýlikten astam ýaqyt boıy reısterin oryndamaǵan. Sonyń saldarynan elge qaıtýy tıis adamdardyń sany kóbeıdi, reıster qaıta jandanǵan kúnniń ózinde, barlyǵyn birden jetkizý múmkin emes. Osy sebepti keıbir týrıster usha almaı qaldy, — dep túsindirdi Inna Reı.

Onyń aıtýynsha, barlyq týrıstik kompanııa áýe kompanııalarymen birlesip atalǵan máseleni jedel sheshýge tyrysyp jatyr. Kóptegen jolaýshy erterek shyǵýǵa tyrysty nemese baǵytyn ózgertip úlgerdi, bul óz kezeginde áýe kompanııalarynda bos oryndardyń paıda bolýyna sebep boldy, sondyqtan reıster jedel qalyptasyp jatyr.

— Ýaıymdaýdyń qajeti joq. Týrkod alǵan barlyq týrıst baqylaýda, olardyń barlyǵynda bizge «TÝRKOD» mobıldi qosymshasy arqyly habarlasýǵa, eger qandaı da bir qyzmet kórsetý sapasyna qatysty kemshilikterdi baıqasa, habar jiberý múmkindigi bar. Eń bastysy sabyr saqtap, túsinistik tanytý, eger áýe kompanııasy ushýǵa sheshim qabyldasa, demek barlyq táýekel eskerilgen, — deıdi Inna Reı.

Osy oraıda «Týrıstik Qamqor» korporatıvtik qorynyń basshysy áýe kompanııalary men týrıstik kompanııalarǵa senim artý kerektigin, eger tótenshe jaǵdaı týyndasa, týrıstik kompanııa ókilderi usynǵan erejelerge qulaq asý qajettigin eskertti.

Aıta ketsek, Syrtqy ister mınıstrligi habarlaǵandaı, 70-ke jýyq qazaqstandyq Irannan shyǵaryldy.

Sondaı-aq elimizdiń Syrtqy ister mınıstrliginiń málimetinshe, búginde Iranda – 132, Izraılde – 219 Qazaqstan azamaty bar.