Dýbaı týrısterge arnalǵan alǵashqy biregeı baǵdarlamasyn usynady
ASTANA. KAZINFORM — Dýbaıda týrısterge bes jyldyq kóp mártelik vıza men arnaıy jeńildikter usynatyn Dubai Access Club baǵdarlamasy iske qosylady, dep habarlaıdy Kazinform agenttigi Time Out Dubai basylymyna silteme jasap.
Baǵdarlama Dýbaıǵa turaqty keletin týrıster sanyn arttyryp, olardyń saıahatyn barynsha jaıly etýge arnalǵan.
Oǵan qatysý quny — 4 myń dırham (shamamen 1 100 dollar). Sondaı-aq BAÁ aýmaǵynda júrgen ótinish berýshilerden qosymsha 650 dırham alym alynady.
Іrikteýden ótkenderge bes jyldyq kóp mártelik vıza beriledi. Onyń negizinde týrıster elde jyl saıyn ár kelgen saparynda 90 kúnge deıin júre alady. Buǵan qosa, olarǵa 2 myń dırham (shamamen 545 dollar) kóleminde kredıt usynylady. Ony arnaıy tizimge engen qonaqúılerde turý, kórikti jerlerdi aralaý jáne tańdalǵan dúkenderden saýda jasaý úshin paıdalanýǵa bolady.
Ótinim berý úshin fotosýret, pasport kóshirmesi, sońǵy alty aıdaǵy bank shotynan úzindi, medıtsınalyq saqtandyrý polısi jáne eki baǵytqa da áýe bıletteri usynylýǵa tıis.
Baǵdarlamaǵa Visit Dubai uıymynyń jekelegen korporatıvtik seriktesteri men turaqty klıentterge arnalǵan baǵdarlamalary arqyly qosylýǵa bolady. Jeke tulǵalar men kompanııalar ótinimderin uıymnyń resmı saıtynda tirkeı alady. Degenmen baǵdarlamaǵa qatysýǵa túpkilikti ruqsat Dýbaıdyń Rezıdenttik jáne sheteldikter isteri jónindegi bas basqarmasy (GDRFA) maquldaǵannan keıin beriledi.
Buǵan deıin Taıaý Shyǵystaǵy qaqtyǵystyń Dýbaı týrızmine qalaı áser etkenin jazǵan edik.
