Dýbaı – Tel-Avıv reısi borttaǵy oqıǵadan keıin Saýd Arabııasyna qondy
ASTANA. KAZINFORM – Áýe kompanııasy jolaýshylardyń qaýipsizdigin rastady, oqıǵanyń mán-jaıy anyqtalyp jatyr, dep habarlaıdy Kazinform agenttiginiń menshikti tilshisi.
Flydubai áýe kompanııasynyń Dýbaıdan Tel-Avıvke FZ1073 reısin oryndaǵan ushaǵy 30 qyrkúıek kúni tańerteń Saýd Arabııasynyń soltústik-batysyndaǵy Tabýk áýejaıyna shuǵyl qondy.
Reuters agenttigi áýe kompanııasynyń ókiline silteme jasap habarlaǵandaı, barlyq jolaýshynyń jaǵdaıy jaqsy.
Aldyn ala málimetke sáıkes, Izraıldiń qaýipsizdik qyzmetteri oqıǵaǵa ushqyshtar arasyndaǵy janjal sebep bolýy múmkin degen boljam jasap otyr. Izraıldik derekkózder ushaqty basyp alý nusqasy joqqa shyǵarylǵanyn habarlady.
Al Flydubai áýe kemesiniń bortynda oqıǵa bolǵanyn rastaǵanymen, onyń qandaı jaǵdaıda jáne ne sebepti bolǵanyn ázirge naqtylaǵan joq.
Ushý kezinde ushaq jalpy tótenshe jaǵdaıdy bildiretin 7700 kodyn, keıin qysqa ýaqytqa ushaqty basyp alý jaǵdaıynda qoldanylatyn 7500 kodyn jibergen. Áýe kemesi baǵytyn ózgertip, bıiktigin kúrt tómendetken. Bastapqyda Izraıl bıligi ekıpajben baılanysa almaı, ushaq basyp alynýy múmkin degen kúdik týyndady.
Izraıl joıǵysh ushaqtardy áýege kóterip, premer-mınıstr Bınıamın Netanıahý men armııa basshylyǵy shuǵyl keńes ótkizdi. Keıin ushaqpen baılanys qalpyna kelip, áýe kemesi Tabýk áýejaıyna qondy.
Flydubai jolaýshylardy Tel-Avıvke jetkizý úshin Tabýkke qosymsha ushaq jibermek.
Netanıahý keńsesi jaǵdaıdyń baqylaýda ekenin málimdedi.
— Qazirgi ýaqytta Izraıl azamattaryn elge qaýipsiz jetkizý úshin barlyq qajetti shara qabyldanyp jatyr, — delingen habarlamada.
Izraıl áýejaılar basqarmasy áýe keńistigi jabyldy degen aqparatty joqqa shyǵardy.
Vedomstvo málimetinshe, áýejaılar qalypty rejımde jumys istep tur. Oqıǵa kezinde de Izraıldiń áýe keńistigi jabylǵan joq.
Buǵan deıin Dýbaıdan Tel-Avıvke ushqan reıs apattyq sıgnal berip, Izraıl joıǵysh ushaqtardy kótergenin habarlaǵan edik.
